Ուրբաթ Երևանում և ընդհանրապես Հայաստանում առատ ձյուն է տեղում ու սառը քամի`այսպիսով վերջ դնելով մայրաքաղաքում տիրող չոր և համեմատաբար տաք եղանակին, ինչը բնորոշ չէ տարվա այս եղանակին:

Ինչպես տեղեկացնում է արտակարգ իրավիճակների նախարարության մամլո ծառայությունը, հանրապետության մարզերի մեծ մասում առաջիկա օրերին ժամանակ առ ժամանակ սպասվում է ձյուն, առանձին վայրերում` մառախուղ և քամու ուժգնացում, իսկ լեռնային շրջաններում և լեռնանցքներում կդիտվի բուք:

Ըստ ԱԻՆ-ի տվյալների` ուրբաթ առավոտյան ՀՀ գրեթե բոլոր ավտոճանապարհներն անցանելի են եղել, և փակ է միայն Սելիմի լեռնանցքը: Իսկ մերկասառույցի հետևանքով դժվարանցանելի են Բերդ-Ճամբարակ, Բերդ-Իջևան, Վանաձոր-Ալավերդի ավտոճանապարհները և Դիլիջանի ոլորանների հատվածը:

Այս տարի, ինչպեսև նախորդող երկու տարիներին Հայաստանում ձմեռը սակավաձյուն էր:

«Հայպետհիդրոմետ» ծառայության օպերատիվ հիդրոօդերևութաբանության կենտրոնի ղեկավար Զարուհի Պետրոսյանն ասում է, որ նման եղանակը բնականոն երևույթ է:

«Դեկտեմբերը ձնառատ էր, սակայն հունվարը` ոչ այնքան, բայց առաջիկա օրերին այդ բացը կլրացվի, քանի որ հանրապետությունում օդի ջերմաստիճանը հունվարի 20-ին կնվազի 5-6 աստիճանով, 21-ի գիշերը` ևս 2-4-ով, և կլինեն տեղումներ»,- ասում է Պետրոսյանը` հավելելով, որ հունվարի 22-24-ին սպասվում է առանց տեղումների եղանակ, և ջերմաստիճանը կբարձրանա 2-4 աստիճանով:

Երևանում ուրբաթ ցերեկը կլինի -1C (30,2` ըստ Ֆարենհայթի), իսկ գիշերը` -12C (10,4` ըստ Ֆարենհայթի):

Երևանի քաղաքապետարանի կոմունալ վարչության աշխատակից Վասիլի Աբրահամյանն «ԱրմենիաՆաուին» տեղեկացնում է, որ քաղաքապետարանը տեղումների մաքրման աշխատանքներին հավուր պատշաճի է պատրաստվել, և արդեն առավոտյան ժամը 4-ից սկսվել են փողոցների ու մայթերի մաքրման աշխատանքները:

«Այս պահին գործի է դրվել 166 մեքենա, որոնք փողոցներում և մայթերում իրականացնում են մաքրման աշխատանքներ: Ներկա պահին կան 2000 տոննա աղ և շուրջ 4000 խմ ավազ, որոնք նման տեղումների համար լիովին բավարար են»,- ասում է Աբրահամյանը:

Ի դեպ, Երևանում հունվարի 20-ի համար օդի առավելագույն ջերմաստիճանը գրանցվել է 1961-ին`12,5 C (54,5` ըստ Ֆարենհայթի), իսկ նվազագույնը 1906-ին` -22,8 C (-9,04` ըստ Ֆարենհայթի):