Ֆրանսիայի Սենատի` Հայոց ցեղասպանության ժխտումը քրեականացնող օրենքի ընդունումը դաշնակցական պատգամավորը համարում է քաղաքական մեծ հաջողություն աշխարհի բոլոր հայերի համար, իսկ Ֆրանսիայի համար` արդարության հաղթանակ:

«Օրենքի ընդունումը Թուրքիայում ողջամիտ թուրքերի հաղթանակն է, նրանք արդեն սկսել էին արտահայտվել այն մասին, որ արտասահմանում նման օրենքներ, բանաձևեր են անհրաժեշտ, որպեսզի Թուրքիայի ներսում կարելի լինի աջակցել թուրքերին ծանոթանալու իրենց պատմությանը»,- ասում է ՀՅԴ բյուրոյի Հայ դատի և քաղաքական հարցերի գրասենյակի պատասխանատու Կիրո Մանոյանը:

Ֆրանսիայի խորհրդարանի վերին պալատի 348 սենատորների քվեարկությունը, որն ավարտվեց 127:86 ձայների հարաբերակցությամբ` հօգուտ օրինագծի, ըստ Մանոյանի, ցույց տվեց որ Ֆրանսիան չի վախենում Թուրքիայի սպառնալիքներից:

«Անշուշտ, Թուրքիայի քաղաքականության պարտությունն էր: Թուրքիան ամեն ինչ փորձեց անել, այնքան բարձրացրեց նշաձողը, որ վերջում այդ բարձունքից վայր ընկնողը եղավ ինքը: Մի անգամ ևս հաստատվեց, որ Թուրքիան պատրաստ չէ իր պատմության հետ անկեղծ առերեսման նստելու»,- ասում է ՀՅԴ ներկայացուցիչը:

Կիրո Մանոյանը համոզված է, որ Ֆրանսիայի օրինակին կհետևեն Եվրամիության մյուս երկրները:

Ըստ Մանոյանի`օրինագծի ընդունումը ֆրանս-թուրքական հարաբերությունների վրա ժամանակավորապես կազդի:

«Առաջիկա օրերին` նույնիսկ մի քանի շաբաթ, կլինի հարաբերությունների սառեցում, դիվանագիտական հարաբերությունների աստիճանի իջեցում, տնտեսական առումով Թուրքիան, կարծում եմ, շատ բան չի կարող անել: Մինչ այս Թուրքիայում հնչում էին մտահոգություններ, որ ֆրանսիական արտադրությունների բոյկոտի մասին չխոսեն, որովհետև իրենք էլ դրանում շահեր ունեն: Թուրք-ֆրանսիական առևտրային շահերը այդքան էլ հեշտ չեն փոխարինվի»,- ասում է Մանոյանը: