Readers' comments

Would you like to post a comment ? Be the first to share your thoughts.

Post a comment

Comments are welcomed and encouraged. However, comments not pertaining to the topic or containing slander or offensive language will be deleted. You have to be registered to be able leave your comment. Sign in or Register now for free.

Մեծացնել նկարը

«Չնայած միջազգային հանրության բարենպաստ կարծիքը Հայաստանի մասին շարունակվել է 2005 թվականին նրա վարած տնտեսական քաղաքականության շնորհիվ, Հայաստանի իշխանությունները ձեռքբերումներ չեն գրանցել մարդու իրավունքների պաշտպանության բնագավառում»,- ասված է Human Rights Watch կազմակերպության չորեքշաբթի հրապարակված 2006 թ. համաշխարհային զեկույցում, որն անդրադառնում է մարդու իրավունքների վիճակին աշխարհի 60 երկրներում:

Զեկույցում խիստ քննադատության են ենթարկվել Հայաստանի իրավապահ մարմինները` իրենց աշխատանքում կիրառած տանջանքների ու դաժան վերաբերմունքի համար: «Տանջանքները սովորաբար կիրառվում են նախադատական կալանման ժամանակ` խոստովանություն կամ երրորդ կողմի դեմ ցուցմունք կորզելու նպատակով: Բանակում լայն տարածում են գտել դաժան վերաբերմունքն ու չարաշահումները, ամեն տարի գրանցվում են մահվան տասնյակ կասկածելի դեպքեր»,- նշվում է զեկույցում:

Այն քննադատում է Հայաստանի իշխանություններին ընդդիմադիր կուսակցությունների հանրահավաքները խոչընդոտելու և հավաքների ազատությունը սահմանափակելու համար: «Իշխանությունները բազմիցս ճնշում են գործադրել կառավարության գործողությունները քննադատած մարդու իրավունքների պաշտպանների նկատմամբ: 2005 թվականին այդ ճնշումները տարածվել են ընդհուպ մինչև Հայաստանի մարդու իրավունքների պաշտպանի գրասենյակ»,- ասվում է զեկույցում:

Զեկույցն արձանագրում է, որ Հայաստանում առկա է զգալի թվով անկախ և ընդդիմադիր տպագիր մամուլ, սակայն նշում է, որ իշխանությունները շարունակում են սահմանափակել մամուլի լիակատար ազատությունը երկրում: Հայաստանի մասին անկախ լրատվություն տարածած «Ա1+», «Նոյյան տապան» և ռուսական HTB հեռուստաալիքները շարունակում են զրկված մնալ եթերից, քանի որ իշխանությունները զրկել են նրանց հեռարձակման հաճախականություններից:

Անդրադառնալով դավանանքի ազատությանը` զեկույցը նշում է, որ չնայած 2004 թվականի նոյեմբերին այլընտրանքային ծառայության մասին օրենքում արված փոփոխություններին` Եհովայի վկաները շարունակում են ենթարկվել հետապնդումների` զինվորական ծառայությունից հրաժարվելու համար: Ըստ Հայաստանի հելսինկյան ընկերակցության` 2005 թ. սեպտեմբերին զինվորական ծառայությունից հրաժարվելու համար 16 Եհովայի վկաներ դատապարտվել էին ազատազրկման, իսկ 19-ը սպասում էին դատավարության:

«Չնայած Հայաստանին ուղղված Եվրախորհրդի հորդորներին` կատարել անդամակցությամբ ստանձնած պարտավորությունները, տեղական կազմակերպությունները քննադատում են Եվրոպայի խորհրդին թույլ մոնիտորինգի և սահմանադրության` իշխանությունների առաջարկած փոփոխություններին հավանություն տալու համար: Եվրախորհրդի առաջ Հայաստանի ստանձնած պարտավորություններից շատերը մնում են չկատարված, այդ թվում` քաղաքական նպատակներով վարչական կալանքների պրոբլեմը, էլեկտրոնային լրատվամիջոցների բնագավառում բազմակարծության ապահովումը, այլընտրանքային ծառայության հարցի լուծումը և այլն»,- ասված է զեկույցում:

Զեկույցում նաև նշվում է, որ Միացյալ Նահանգները և Ռուսաստանը շարունակում են մրցակցել Հայաստանում ազդեցության համար: Միացյալ Նահանգներն իր բողոքն է արտահայտել ռուսական մի ընկերությանը Հայաստանի բաշխիչ էլեկտրացանցերի վաճառքում թափանցիկության բացակայության առիթով: Այդ գործարքը մեծացրել է Ռուսաստանի վերահսկողությունը Հայաստանի էներգետիկական հատվածի վրա: Հանելով իր ռազմակայանները Վրաստանից` Ռուսաստանը ռազմական տեխնիկայի մի մասը տեղափոխել է Հայաստան: «Միացյալ Նահանգների հետ կապերի ամրապնդումը հանգեցրել է նրան, որ 2005 թվականի հունվարին Հայաստանը 46-հոգանոց զորախումբ է ուղարկել Իրաք` միանալու կոալիցիոն ուժերին: Մարտին Հայաստանը և ԱՄՆ-ը ստորագրել են փաստաթուղթ ամերիկյան օգնության բազմամիլիոն` «Հազարամյակի մարտահրավերներ» ծրագրին Հայաստանի մասնակցության մասին: Այն հիմնականում ուղղված է ֆինանսավարկային քաղաքականության, բանկային համակարգի և գյուղատնտեսության զարգացմանն ու կոռուպցիայի դեմ պայքարին»:

Զեկույցն ամբողջությամբ կարելի է կարդալ http://www.hrw.org/wr2k6/eca/index.htm կայքում: