Readers' comments

Would you like to post a comment ? Be the first to share your thoughts.

Post a comment

Comments are welcomed and encouraged. However, comments not pertaining to the topic or containing slander or offensive language will be deleted. You have to be registered to be able leave your comment. Sign in or Register now for free.

Մեծացնել նկարը

Սարգսյան. աշխատում է դոմիկում, երազում տեխնոպարկի մասին

Մեծացնել նկարը

Ո'չ երկրաշարժը, ո'չ էլ «դոմիկային» պայմանները ի զորու չէին խոչընդոտելու հետազոտությունները

71-ամյա Սարգսյանը Գյումրիի հատուկ փորձարարական-կոնստրուկտորական տեխնոլոգիական ինստիտուտի տնօրենն է, որը 1988 թ. երկրաշարժից հետո ծավալում է իր գործունեությունը փայտի վառարանով տաքացվող ժամանակավոր տնակներում:

Եթե երկրաշարժը վնասեց ինստիտուտի շենքն ու սարքավորումները, ապա Խորհրդային Միության փլուզման հետևանքով այն կորցրեց իր համբավն ու պատվերները:

«Մեր մասնագիտությունն արդեն մեր արյան մեջ է, և անգամ այս դժվար տարիներին չենք թալանել կամ վաճառել ինստիտուտին պատկանող գույքը, այլ փորձել ենք գոյատևել` շարունակելով իրականացնել մեր մտահղացումները»,- ասում է Սարգսյանը, որը սեյսմիկ սարքավորումների կոնստրուկտորի 50 տարվա աշխատանքային փորձ ունի:

Սարգսյանը հավաստիացնում է, որ երկրաշարժից հետո Գյումրիի տասնյակ նման գիտաարտադրական օջախներից պահպանվել են ընդամենը մի քանիսը, որոնք փորձում են գոյատևել «վաղվա հույսով»:

Այդ վաղը կարող է գալ մի քանի տարուց՝ Գյումրիում տեխնոպարկ կառուցելու կառավարության որոշման իրականացմամբ:

Այս ամսվա սկզբին Հայաստանի կառավարության հավանությանն արժանացած այս ծրագրի նպատակն է վերականգնել քաղաքի նախկին արտադրական և տեխնոլոգիական ներուժը և աշխատանքով ապահովել Շիրակի մարզի բարձր որակավորում ունեցող մասնագետներին:

«Գյումրիում տեխնոպարկի ստեղծման ծրագիրը կարևոր է մի քանի առումներով` սոցիալական, զբաղվածության, տեղի գիտական պոտենցիալի օգտագործման, ինչպես նաև փոքր ու միջին բիզնեսի զարգացման առումով»,- «ԱրմենիաՆաուի» թղթակցին ասաց Հայաստանի առևտրի և տնտեսական զարգացման փոխնախարար Արմեն Գևորգյանը:

Սա կդառնա Հայաստանի երկրորդ տեխնոպարկը` երևանյան «ՎիաՍֆեր տեխնոպարկից» հետո, որը ստեղծվել է վեց տարի առաջ և այս պահին ընդգրկում է 12 ընկերություն` միկրոէլեկտրոնիկայի, վակուումային տեխնոլոգիաների, բնական էներգիայի շահագործման և այլ ոլորտներում:

Սակայն, ի տարբերություն երևանյան տեխնոպարկի, որը ստեղծվել է հիմնականում ԱՄՆ և եվրոպական երկրների ընկերությունների ջանքերով, Գյումրիի տեխնոպարկի ստեղծման ջատագովը Հայաստանի կառավարությունն է:

«Տեխնոպարկ ստեղծելը թանկ հաճույք է, սակայն այս նպատակով կառավարությունը պատրաստ է և’ ֆինանսապես, և’ կազմակերպչական առումով հնարավորինս աջակցել»,- ասում է փոխնախարարը՝ միաժամանակ կոչ անելով տեղական իշխանություններին ու գիտնականներին ակտիվորեն մասնակցելու ծրագրին:

Մինչև 1988 թ. Գյումրիում գործում էին 38 ձեռնարկություն ու գիտահետազոտական ինստիտուտ, որոնք տալիս էին տարբեր արտադրատեսակներ` հաստոցներ ու սարքավորումներ, կահույք, շինանյութ ու սննդամթերք: Սա կազմում էր Խորհրդային Հայաստանի արտադրանքի շուրջ 7 տոկոսը, իսկ այս ձեռնարկություններում աշխատում էր մոտ 21 հազար մարդ:

Այսօր պաշտոնական տվյալներով Գյումրիում գործող 48 փոքր ձեռնարկություններում աշխատում է ընդամենը 780 մարդ:

Փոխնախարարը հույս է հայտնում, որ տեխնոպարկի շնորհիվ հնարավոր կլինի վերականգնել այն գիտական պոտենցիալը, որն առկա էր Գյումրիում մինչև երկրաշարժ:

Նախատեսվում է նոր տեխնոպարկը հիմնադրել Գյումրիի «Անալիտիկսարք 1» արդյունաբերական ձեռնարկության հիմքի վրա, որի արտադրանքն այսօր էլ օգտագործվում է նավերի ու սուզանավերի վրա:

Ֆինանսավորման աղբյուր կհանդիսանան «Նոր ներդրումներ» ընկերությունը (որի 100% բաժնետոմսերը պատկանում են պետությանը) և մասնավոր ձեռնարկություններ: Տեխնոպարկի սկզբնական փուլի արժեքը 200 հազար դոլար է:

«Նոր ներդրումներ» ընկերության փոխտնօրեն և ծրագրի ղեկավար Գագիկ Կարապետյանի հավաստմամբ՝ փոքր և միջին բիզնեսի զարգացման նպատակով տեխնոպարկը կհանդիսանա նաև բիզնես-ինովացիոն կենտրոն, որը փոքր ձեռնարկություններին կտրամադրի հատուկ սարքավորված տարածքներ, ինչպես նաև կմատուցի տեղեկատվական, խորհրդատվական և այլ օգտակար ծառայություններ:

Ծրագրի շահագրգիռ կողմերը հույս են հայտնում, որ տեխնոպարկը պատրաստ կլինի 2008-ին, երբ Գյումրիում կնշվի Շիրակում առնվազն 25000 մարդու կյանք խլած երկրաշարժի 20-րդ տարելիցը: Նրանք հույս ունեն, որ դա կնշանավորի գիտության վերածննդի սկիզբը Գյումրիում:

Դա լավ նորություն է Ռոբերտ Սարգսյանի տեխնոլոգիական ինստիտուտի համար, որտեղ լավագույն տարիներին աշխատում էր 130 մարդ: Խորհրդային տարիներին այն համարվում էր սեյսմիկ սարքաշինության երկրորդ խոշոր կենտրոնը Մոսկվայից հետո: Ինստիտուտի հեղինակությունը հիմնված էր ոչ միայն նրա արտադրած սեյսմիկ սարքավորումների, այլև սուզանավեր հայտնաբերող սարքերի վրա:

Այսօր ինստիտուտն արտադրում է ատոմակայանների և ջրամբարների համար նախատեսված սեյսմիկ պաշտպանության համակարգեր, որոնք կիրառվում են ինչպես Հայաստանում, այնպես էլ նրա սահմաններից դուրս:

Ցույց տալով իր գործընկերների հետ ստեղծած սարքերը՝ Սարգսյանն ասում է. «Գյումրին ունի ոչ թե հոդված գրող, այլ արտադրանք տվող գիտական պոտենցիալ: Եվ եթե տեխնոպարկը ստեղծվի, հիանալի կլինի: Մենք դեռ շատ մտահղացումներ ունենք, որոնք մինչև այսօր թղթի վրա են մնացել, սակայն իրոք մրցունակ են»: