Readers' comments

Would you like to post a comment ? Be the first to share your thoughts.

Post a comment

Comments are welcomed and encouraged. However, comments not pertaining to the topic or containing slander or offensive language will be deleted. You have to be registered to be able leave your comment. Sign in or Register now for free.

Հայաբնակ Ախալքալաքում ապրող վերլուծաբան Սեյրան Պետրոսյանը պնդում է, որ Սահակաշվիլու համոզիչ հաղթանակը հայաբնակ շրջաններում պարադոքսալ կերպով ցույց է տալիս վրացահայերի դիմադրությունը ՆԱՏՕ-ին Վրաստանի անդամակցությանը, ինչը պայմանավորված է նրանց մտավախությամբ, թե կաճի Թուրքիայի ազդեցությունը, և կնվազի Ռուսաստանի դերը:

«Վաշինգտոնը քանիցս հնարավորություն է ունեցել հասկացնելու Սահակաշվիլուն, որ ներկայումս Թբիլիսիի հսկողությունից դուրս գտնվող տարածքների` Աբխազիայի ու Հարավային Օսիայի նկատմամբ վերահսկողություն հաստատելու նրա վարած քաղաքականությունը լուրջ խոչընդոտ է ՆԱՏՕ-ին Վրաստանի անդամակցության գործընթացում,- բացատրում է Պետրոսյանը: - Վրաստանի նախագահին հասկացրել են, որ ԱՄՆ-ի համբերությունն անսպառ չէ, և հարկավոր է հնարավորինս արագ կարգավորել այդ հակամարտությունները: Փաստորեն, դա նշանակում է Աբխազիայի ու Հարավային Օսիայի անկախության ճանաչում` ՆԱՏՕ-ում Վրաստանի անհապաղ անդամակցության դիմաց»:

Վրաստանի արտահերթ նախագահական ընտրությունների ձայների հաշվարկը ցույց է տալիս, որ Սահակաշվիլին համոզիչ հաղթանակ է տարել` ստանալով ձայների 52,21 տոկոսը` իր մոտակա մրցակցից գրեթե կրկնակի ավելի:

Վրաստանի կենտրոնական ընտրական հանձնաժողովի հրապարակած տվյալները ցույց են տալիս, որ Սահակաշվիլին մեծ առավելությամբ հաղթանակ է տարել բոլոր հայաբնակ շրջաններում, ընդ որում, Սամցխե-Ջավախեթիում գրանցվել է ընտրողների շատ բարձր ակտիվություն, մասնավորապես, ամենամեծ հայ բնակչություն ունեցող Ախալքալաքում քվեարկել է ընտրողների 65 տոկոսից ավելին:

Մինչդեռ «Ջավախք» հայրենակցական միության նախագահ Շիրակ Թորոսյանը պնդում է, որ Ջավախքի հայ բնակչությունը վերաբերվել է Վրաստանի նախագահական ընտրություններին «լիակատար անտարբերության հասնող պասիվությամբ»:

Նրա խոսքերով` «ընտրողների բացառիկ ցածր մասնակցության» պատճառն այն էր, որ «նախագահական թեկնածուներից ոչ մեկը բավարար պատասխան չի տվել շրջանի հայության բարձրացրած հարցերին»:

Նախագահական ընտրություններին զուգահեռ անցկացված հանրաքվեի երկու հարցերից մեկը Վրաստանի վերաբերմունքն էր ՆԱՏՕ-ին: Թեև հանրաքվեի պաշտոնական արդյունքները դեռևս չեն հրապարակվել, ելքի հարցումները ցույց են տալիս, որ ընտրողների մեծ մասը քվեարկել է հօգուտ իրենց երկրի անդամակցության Հյուսիսատլանտյան դաշինքին:

Վրացի քաղաքական վերլուծաբան Գեորգի Շիբուայի կարծիքով` աշխարհաքաղաքական առումով Վրաստանի նման կարևոր տարածաշրջանային պետության անդամակցությունը ՆԱՏՕ-ին հնարավորություն կտա Վաշինգտոնին կանխելու Ռուսաստանի ազդեցության տարածումը հարավային վեկտորով և նվազագույնի հասցնելու Ռուսաստան-Հայաստան-Իրան ռազմավարական առանցքի գործակցության հնարավորությունը:

«Ամերիկյան քաղաքականության հենց այդ կարևորագույն ուղղությանն է ներկայումս խոչընդոտում Սահակաշվիլին` ՆԱՏՕ-ին անդամակցելու պարտադիր պայման դնելով Աբխազիայի ու Հարավային Օսիայի նկատմամբ լիակատար վերահսկողության վերահաստատումը,- ասում է Շիբուան: - Այսպիսով, ստեղծվում է պարադոքսալ իրավիճակ. իր կամքից անկախ` Սահակաշվիլու գործողություններն ավելի շատ համապատասխանում են Ռուսաստանի, քան ԱՄՆ-ի շահերին»: