Անցյալ շաբաթավերջին պարզ դարձավ, որ այս շաբաթ Ռումինիայում կայանալիք ՆԱՏՕ-ի գագաթնաժողովի շրջանակներում Հայաստանի ու Ադրբեջանի ղեկավարների հանդիպումը, ամենայն հավանականությամբ, տեղի չի ունենա:

Մինչ այդ նախատեսվում էր, որ ապրիլի 2-4-ը Բուխարեստում Հայաստանի նորընտիր նախագահ ու գործող վարչապետ Սերժ Սարգսյանը հանդիպում կունենա Ադրբեջանի ղեկավար Իլհամ Ալիևի հետ:

Հանդիպման նախաձեռնությունը պատկանում էր Եվրոպայի անվտանգության և համագործակցության կազմակերպության (ԵԱՀԿ) Մինսկի խմբին, որը ձգտում է ղարաբաղյան հակամարտության խաղաղ կարգավորմանը:

Եթե հայկական կողմը դրականորեն էր արձագանքել այդ նախաձեռնությանը, ապա պաշտոնական Բաքուն չէր տվել իր համաձայնությունը` հայտարարելով, թե բանակցությունները «թեմա կամ նպատակ» չունեն:

Այդ որոշումը Երևանը չէր ողջունել` ժխտելով, թե հանդիպման խնդրանքով դիմել է Բաքվին` ինչպես պնդում է ադրբեջանական կողմը:

«Առանց որևէ լուրջ հիմնավորման ադրբեջանական կողմը ձախողեց Հայաստանի ու Ադրբեջանի ղեկավարների նախատեսված հանդիպումը»,- ասել է արտգործնախարարության մամուլի քարտուղարի պաշտոնակատար Տիգրան Բալայանը:

Իսկ Մինսկի խմբի ամերիկացի համանախագահ Մեթյու Բրայզան ասել է, որ «կա արարողակարգային խնդիր, քանի որ Սարգսյանը պաշտոնը կստանձնի ապրիլի 9-ին և, այսպիսով, Բուխարեստում նա, ըստ արարողակարգի, դեռևս նախագահ չի լինի»:

Սակայն ադրբեջանական կողմը ներկայացրել է մերժման այլ պատճառ: «Բաքուն միշտ պատրաստ է բանակցելու, բայց անհրաժեշտ են բանակցությունների թեմա և կոնկրետ նպատակ»,- լրագրողներին ասել է Ալիևի աշխատակազմի արտասահմանյան կապերի բաժնի վարիչ Նովրուզ Մամեդովը:

Ադրբեջանի ղեկավարությունը ակնարկել է, որ Սարգսյանի շահագրգռությունն այդ հանդիպումով կարող է նախևառաջ հիմնավորված լինել նրա ցանկությամբ` այդպիսով ցույց տալու ներքաղաքական ընդդիմությանը սեփական լեգիտիմությունը որպես ընտրված նախագահի, ինչն «ընդունում են նույնիսկ Բաքվում»:

Հայաստանը ժխտում է, որ Բուխարեստում հանդիպման նախաձեռնությունն իրենն է, սակայն վերահաստատել է Հայաստանի պատրաստակամությունը հետագա բանակցություններին:

Ադրբեջանցիների հայտարարություններն արվել են այն ժամանակ, երբ Ադրբեջանը շարունակում է իր կոչերը` հրաժարվել բանակցությունների Մինսկի ձևաչափից և տեղափոխել դրանք ՄԱԿ-ի հարթություն:

«Ադրբեջանի նամակը ԵԱՀԿ-ին` Մինսկի խումբը ցրելու հնարավորություն մասին ուղարկվել է ՄԱԿ-ի գլխավոր ասամբլեայում Ադրբեջանի առաջարկած [Ղարաբաղի]
բանաձևի քննարկումից առաջ,- անցյալ շաբաթ «Արմինֆոյին» տված հարցազրույցում ասել է խոսնակ Բալայանը: - Սա ևս մեկ անգամ ապացուցում է, որ Ադրբեջանի պաշտոնյաների պնդումները և քայլերը կապ չունեն խաղաղ կարգավորման գործընթացը շարունակելու իրենց պարտավորության հետ և ավելի շուտ կեղծ, ցուցադրական հանձնառությունների բնույթ են կրում: Դրա վկայությունն է նաև այն, որ ադրբեջանական կողմը, առանց որևէ լուրջ հիմնավորման տապալեց ապրիլին Բուխարեստում ՆԱՏՕ-ի գագաթնաժողովին Ադրբեջանի նախագահի և ՀՀ նորընտիր նախագահի նախատեսվող հանդիպումը»:

Ակնկալվում է, որ ի թիվս այլոց Բուխարեստում ապրիլի 2-4-ը կայանալիք ՆԱՏՕ-ի գագաթնաժողովում կքննարկվեն հարավկովկասյան տարածաշրջանի աշխարհաքաղաքական զարգացման, այդ թվում` ՆԱՏՕ-ին անդամակցելու Վրաստանի հեռանկարները: