Հայաստանի և Ադրբեջանի ԱԳ նախարարների մոսկովյան հանդիպմանը նախորդել էին միջազգային միջնորդների ակտիվ ջանքերը` երկու հարևան երկրների միջև կարգավորման հնարավորություններ ապահովելու առումով:

Հունիսի 6-ին Սանկտ Պետերբուրգում երկու երկրների նախագահների հանդիպումից հետո սա արտգործնախարարներ Էդվարդ Նալբանդյանի և Էլմար Մամեդյարովի առաջին հանդիպումն էր: Այն ժամանակ կողմերը լավատեսորեն էին արտահայտվել Եվրոպայի անվտանգության և համագործակցության կազմակերպության (ԵԱՀԿ) Մինսկի խմբի միջնորդությամբ Լեռնային Ղարաբաղի հիմնախնդրի բանակցային գործընթացի ապագայի մասին:

Անցյալ շաբաթ ԱՄՆ պետքարտուղարի տեղակալի օգնական Մեթյու Բրայզան, դեսպան Յուրի Մերզլյակովը Ռուսաստանից և դեսպան Բեռնար Ֆասիեն Ֆրանսիայից, որոնք երեքով համանախագահում են Մինսկի խմբում, կոչ արեցին կողմերին ձեռնպահ մնալ «մաքսիմալիստական նախաձեռնություններից բանակցային սեղանի շուրջ և իրենց հրապարակային ելույթներում» և խուսափել «ռազմատենչ հայտարարութուններից» և համատեղ ուժերով «հակամարտության խաղաղ կարգավորման ուղիներ փնտրել»:

Երկու երկրների արտգործնախարարների օգոստոսի 1-ի հանդիպումը Մինսկի խմբի համանախագահների վերջին նախաձեռնությունն է: Կողմերը նաև Ռուսաստանի մայրաքաղաքում կհանդիպեն համանախագահների հետ:

Չորեքշաբթի Երևանում անցկացված մամուլի ասուլիսում նախարար Նալբանդյանն ասաց. «Մենք գործադրելու ենք բոլոր ջանքերը, անելու ենք հնարավորը` ղարաբաղյան հարցի լուծման ճանապարհով գնալու համար»:

Հանդիպումից առաջ Մամեդյարովն ասել է, որ Հայաստանի համար կարևոր է «կառուցողական դիրքորոշման» ցուցաբերումը և որ Հայաստանի նոր իշխանությունների համար նման դիրքորոշումն «օգտակար» կլինի:

Նա նաև հորդորել է Հայաստանին ժամանակ չկորցնել` զգուշացնելով, որ «Ադրբեջանի հզորացման պայմաններում» վնասը նրա համար ավելի մեծ կլինի:

Հանդիպման ժամանակ քննարկվելու են ԵԱՀԿ համանախագահների կողմից Մադրիդում կատարված առաջարկները, որոնց համաձայն, ինչպես նշում են երկու նախարարները, հնարավորություն կլինի լուծումներ գտնել:

Հարավային Կովկասում Եվրամիության հատուկ ներկայացուցիչ Փիթեր Սեմնեբին ևս կարևորել է «կառուցողական մոտեցումները», որոնք պետք է միտված լինեն խաղաղ ճանապարհով հակամարտության կարգավորմանը:

Խնդրին է անդրադարձել նաև ԵԱՀԿ գործող նախագահի հատուկ ներկայացուցիչ դեսպան Հեյկի Տալվիտիեն չորեքշաբթի Բաքվում կայացած ասուլիսի ժամանակ. «Լեռնային Ղարաբաղի հակամարտությունը պետք է կարգավորվի Ադրբեջանի տարածքային ամբողջականության շրջանակներում: Այլ հարց է Լեռնային Ղարաբաղի կարգավիճակի հստակեցումը: Տարածքային ամբողջականության և Լեռնային Ղարաբաղի կարգավիճակի սկզբունքները իրար չեն հակասում: Նույնը տեղի է ունենում Վրաստանում և Մոլդովայում»:

Տալվիտիեն ընդգծել է, որ ԵԱՀԿ-ն ողջունում է Հայաստանի և Ադրբեջանի միջև երկխոսության շարունակումը:

«Մենք հատուկ կարևորություն ենք տալիս Արցախի հարցի կարգավորմանը և ԼՂՀ ղեկավարության հետ մշտապես քննարկումներ ենք անցկացնում կարգավորման գործընթացի վերաբերյալ»,- Մոսկվա մեկնելուց առաջ Երևանում ասաց Նալբանդյանը: Նա նաև շեշտեց, որ նույն նպատակին էին ուղղված նաև Հայաստանի և Ադրբեջանի ԱԳ նախարարների հանդիպումները Ստրասբուրգում և Սանկտ Պետերբուրգում:

Անդրադառնալով Հայաստան-Թուրքիա հարաբերություններին` ՀՀ արտգործնախարարը նշել է, որ «Հայաստանի իշխանությունները ոչ այսօր, ոչ էլ վաղը չեն գնա այնպիսի քայլերի, որոնք կխրախուսեն հայոց ցեղասպանության ժխտողականությունը»:

«Նման բան երբեք չի լինի»,- շեշտել է նախարարը:

Նալբանդյանն ասաց, որ հարևան պետության հետ նորմալ հարաբերություններ ու բաց սահմաններ ունենալուն միտված Հայաստանի նախաձեռնությունները դրական արձագանք են գտել միջազգային ասպարեզում:

«Հուսով ենք, որ այդ նախաձեռնությունները նաև Թուրքիայի կողմից դրական արձագանք կգտնեն»,- ասել է Նալբանդյանը: