Մի խումբ թուրք մտավորականների «Ես ներողություն եմ խնդրում» վերնագրված նախաձեռնությունը, որով նրանք որոշել են անձամբ ներողություն խնդրել հայ ժողովրդից Օսմանյան կայսրությունում նրանց նկատմամբ իրականացրած ցեղասպանության համար, մեծ արձագանք է գտել:

www.ozurdiliyoruz.com կայքում խնդրագիր է տեղադրված, որին բոլոր ցանկացողները կարող են միանալ: Խնդրագրի ներքո (որը հրապարակվել է մի քանի լեզուներով) առաջին 24 ժամվա ընթացքում ստորագրել են ավելի քան 5000 մարդ, այդ թվում` ավելի քան 200 թուրք լրագրողներ, քաղաքագետներ, պատմաբաններ, երաժիշտներ և գիտնականներ:

Այդուհանդերձ, խնդրագրում «ցեղասպանություն» բառը չի հիշատակվում, փոխարենը խոսվում է «մեծ աղետի» մասին:

«Իմ խիղճը չի ընդունում, որ մենք անհաղորդ մնանք և ուրանանք մեծ աղետը, որին Օսմանյան Թուրքիայի հայերը ենթարկվել են 1915 թ.: Ես մերժում եմ այդ անարդարությունը, կիսում հայ եղբայրներիս ու քույրերիս զգացմունքներն ու ցավը և ներողություն խնդրում նրանցից»:

Ստորագրողների թվում են ոչ միայն Թուրքիայի քաղաքացիներ, այլև տարբեր երկրներում ապրող թուրքեր: Ըստ «Հուրիեթ» թուրքական օրաթերթի` առցանց խնդրագրի ներքո ստորագրել է վերջերս Գերմանիայի «կանաչների» կուսակցության համանախագահ ընտրված Ջեմ Օզդեմիրը (Օզդեմիրի անունը կայքէջում կա):


Նախաձեռնությունն ինքնին համաշխարհային ԶԼՄ-ների ուշադրության կենտրոնում է հայտնվել:

«Կուրիեր դելա Սերա»-ն իր` «300-ի նամակը` հայեր, ներեցե՛ք մեզ» վերնագրով հոդվածում նշում է. «Ռեջեփ Էրդողանի չափավոր իսլամական կառավարության և հանրապետության նախագահ Աբդուլլահ Գյուլի լռությունը կարելի է դիտարկել որպես Հայաստան-Թուրքիա մերձեցմանն ուղղված նախաձեռնության նկատմաբ հետաքրքրության ապացույց»:

Ռուսական ինտերնետային Point.ru հանդեսը իր հոդվածը վերնագրել է` «Թուրքերի և հայերի միջև սառույցը հալչում է. «Ենիչերիները» ներողություն են խնդրել»:

«Պաշտոնական Անկարան ոչ մի կերպ չէր ցանկանում ճանաչել հայ ժողովրդի զանգվածային ջարդը, որը հետագայում համապատասխանեցվեց «ցեղասպանություն» հասկացությանը, և ոչ էլ ներողություն խնդրել հայերից»: Այդուհանդերձ, սառույցը ճեղքվեց»,- ասվում է ռուսական լրատվամիջոցի հոդվածում:

Թեմային անդրադարձել են նաև «Հրեական ամսագիրը»` «Թուրքերը հայ եղբայրներից ներողություն են խնդրում ինտերնետում» հոդվածում, BBC-ն, «Ասոշիեյթեդ պրեսը» և մի շարք ադրբեջանական և հայկական լրատվամիջոցներ:

Մինչ այդ, թուրքական լրատվամիջոցները հաղորդում են, որ նախաձեռնությունը սուր քննադատության է ենթարկվել երկրի ազգայնական տրամադրված շրջանակների կողմից: Շուրջ վեց տասնյակ թուրք նախկին դեսպաններ այն որակել են «անարդար, սխալ և ազգային շահերին հակասող»:

«Նման սխալ և միակողմանի նախաձեռնությունը կնշանակի ոչ այլ ինչ, քան մեր երկրի պատմության նկատմամբ անհարգալից վերաբերմունք»,- ասվում է նախկին դիվանագետների հայտարարության մեջ: