Ապրիլի 3-ին Կոնգրեսի հայկական հարցերի հանձնախմբի 34 անդամներ աջակցող նամակ են ուղարկել Պետական արտաքին գործառնությունների հատկացումների ենթահանձնաժողովի նախագահ Նիթա Լոուին (դեմոկրատ` Նյու Յորքի նահանգից) և բարձրաստիճան անդամ Քեյ Գրանգերին (հանրապետական` Տեխասի նահանգից)` խնդրելով, որ 2010 թ. ֆինանսական տարվա հատկացումների օրինագծով շարունակվի «ԱՄՆ օգնությունը Հայաստանին և կովկասյան տարածաշրջանի խաղաղությանն ու կայունությանը նպաստող այլ օգնություն»:

«Հայաստանի ժողովուրդը շարունակում է կրել Թուրքիայի և Ադրբեջանի կրկնակի շրջափակման աղետալի ազդեցությունը: Համաշխարհային բանկի մի քանի տարի առաջ կատարված հաշվարկներով` այդ հակաօրինական գործողությունները տարեկան մոտ 720 միլիոն դոլարի վնաս են հասցնում Հայաստանին: Շրջափակման հետևանքով [միայն 2008 թվականին] Հայաստանի տնտեսությանը հասցվել է մոտ 680 միլիոն դոլարի վնաս` հավելյալ տրանսպորտային ծախսերի, ավելի բարձր գների և կորսված ներդրումների պատճառով, որպես ռուս-վրացական վերջին հակամարտության հետևանք: Այդ հակամարտության ընթացքում Հայաստանը մարդասիրական, դիվանագիտական և տնտեսական օգնություն ցույց տվեց Վրաստանին, դյուրացրեց ամերիկացի և միջազգային պաշտոնյաների ապահով տարանցումը և աջակցություն ցույց տվեց Վրաստանի վնասված ենթակառուցվածքները վերականգնելու գործում»,- նշվում է նամակում:

Նամակը, մասնավորապես, կոչ է անում վերացնելու պետքարտուղարության և կապալառուների ներկայացուցիչների` Ղարաբաղ այցելելու համար պատժամիջոցները:

«Հանուն փոխըմբռնման և տարածաշրջանային համագործակցության զարգացման, արդար և երկարատև խաղաղության, հանձնաժողովը կոչ է անում պետքարտուղարությանը վերացնելու բոլոր պաշտոնական և ոչ պաշտոնական սահմանափակումները` ամերիկացի պաշտոնյաների` Լեռնային Ղարաբաղ այցերի վրա` այցելությունների, քննարկումների, հանդիպումների, շփումների, խորհրդակցությունների, փոխանակման ծրագրերի կամ այլ կառավարական կամ քաղաքացիական հասարակության հաղորդակցությունների, համագործակցության կամ շփումների նպատակով»,- ասվում է նամակում:

Նամակում ընդգծվում են ֆինանսավորման և քաղաքական մի քանի գերակայություններ. Ազատության աջակցության ակտի 907 հոդված, տնտեսական աջակցություն Հայաստանին, ռազմական աջակցություն Հայաստանին, աջակցություն Լեռնային Ղարաբաղին, վստահության հաստատման միջոցներ և Լեռնային Ղարաբաղի հետ շփումների և հաղորդակցությունների սահմանափակումների վերացում:

«Թեև շատ բան է արվել այն բանից հետո, երբ ԱՄՆ Կոնգրեսն առաջին անգամ որոշեց միջոցներ հատկացնել Ղարաբաղին մարդասիրական օգնություն ցույց տալու համար, դեռևս շատ անելիք կա,- ասում է Ամերիկայի հայկական համագումարի (կազմակերպությունը Վաշինգտոնում Հայաստանի և Ղարաբաղի համար օգնություն ապահովելու լոբբինգ է իրականացնում) հայաստանյան գրասենյակի տնօրեն Արփի Վարդանյանը: - Հատկապես հրատապ լուծման կարիք ունեն առողջապահության, կրթության, խմելու և ոռոգման ջրի, սանիտարական, ականազերծման, ենթակառուցվածքների զարգացման և այլ հարցեր: Օրինակ` Ղարաբաղի որոշ շրջաններում բնակչության զգալի մասը զրկված է մաքուր և ապահով, ամեն օր մատչելի խմելու ջրից` մի բան, որ այնքան բնական է բոլորիս համար: Ղարաբաղում դեռ կան ականներ, և քանի դեռ դրանք պրոֆեսիոնալ մակարդակով չեն վնասազերծվել, մարդիկ և անասունները մնում են վտանգված»:

Համագումարը հորդորում է ենթահանձնաժողովին 2010 թ. ֆինանսական տարում պահպանել ԱՄՆ օգնությունը Հայաստանին «ոչ պակաս, քան» 70 միլիոն դոլարի մակարդակի վրա:

«Այս նամակը, ինչպես նաև Համագումարի հոգաբարձուների խորհրդի անդամ Վան Գրիգորյանի անցյալ ամսվա հայտարարությունը, ընդգծում են այն սերտ կապերը, որ կան ԱՄՆ-ի ու Հայաստանի միջև և կարևորում են արտաքին քաղաքականության գերակա նպատակները»,- ասել է Ամերիկայի հայկական համագումարի գործադիր տնօրեն Բրայան Արդունին: