ՀՀ վարչապետ Տիգրան Սարգսյանին այնքան էլ բնորոշ չէ արտաքին քաղաքականության հարցերի շուրջ կարծիք հայտնելը, սակայն երբ խոսում է այս թեմայով, նրա խոսքը առանձնակի կշիռ Է ձեռք բերում: Սա վերաբերում է մասնավորապես շաբաթավերջին Թուրքիայի հետ հարաբերությունների մասին արված նրա մեկնաբանություններին:

Դեկտեմբերի 19-ին թուրքական Hürriyet Daily News թերթին տված հարցազրույցում ՀՀ վարչապետը հայտարարել է, որ եթե Թուրքիան շարունակի «նախապայմաններ» առաջադրել հայ-թուրքական արձանագրությունների վավերացման համար, ապա Հայաստանը չի վավերացնի խնդրահարույց փաստաթղթերը:

«Մենք հուսով ենք, որ Թուրքիան չի ձեռնարկի քայլեր, որոնք կարող են ձախողել Հայաստանի և Թուրքիայի միջև համաձայնությունը: Եթե իրադարձությունները նման ընթացք ստանան, Հայաստանի խորհրդարանը չի վավերացնի հարաբերությունների կարգավորման հայ-թուրքական արձանագրությունները: Եթե այն ձախողվի Թուրքիայի նախապայմանների պատճառով, վերջինս պետք է բացատրություններ տա պատճառների մասին: Թուրքիայի հեղինակությունն այդ դեպքում կասկածի տակ է դրվելու: Նույնը վերաբերում է նաև հետագայում կլոր սեղանի շուրջ բանակցություններ անցկացնելու նպատակահարմարությանը»,- հայտնել է ՀՀ վարչապետ Տիգրան Սարգսյանը:

Փաստորեն, ոչ թե ՀՀ արտգործնախարար Էդվարդ Նալբանդյանը, այլ հենց Տիգրան Սարգսյանը պաշտոնապես հնչեցրեց պաշտոնական Երևանի այժմյան դիրքորոշումը: Ինքնին կարևոր իրադարձություն է:

«Հայկական կողմի դիրքորոշումը չի փոխվել, սակայն Թուրքիայի վարչապետ Ռեջեփ Թայիփ Էրդողանի հայտարարություններից դատելով (արված դեկտեմբերի 7-ին` Վաշինգտոնում)` փոփոխություններ է կրել Թուրքիայի դիրքորոշումը, ինչը նշանակում է, որ Թուրքիայի խորհրդարանը կարող է նախապայմաններ առաջ քաշել: Եթե Թուրքիան նախապայմաններ առաջ քաշի, ապա Հայաստանն ազատ է լինելու նույն կերպ վարվել»- ընդգծել է Սարգսյանը:

Այսինքն` ՀՀ վարչապետը չի բացառել բանակցային գործընթացի դադարեցման հնարավորությունը:

Սարգսյանը հասկացրել է թուրքական գործակալությանը, որ «հայ-թուրքական սահմանի փակման մեղավորն ի սկզբանե Թուրքիան է» , և որ «պետք չէ Հայաստանին հարցնել ստորագրված արձանագրությունների վավերացման ժամկետների մասին, քանի որ ժամկետները կախված են Թուրքիայի օրենսդիր մարմնից»:

«Սակայն, եթե մենք զգանք, որ Թուրքիայի խորհրդարանն իսկապես չի խոչընդոտում գործընթացը, ապա համապատասխան եզրահանգումներ կանենք»,- հավելել է վարչապետն` առանց մանրամասնելու:

ՀՀ վարչապետը շարունակել է` քննադատելով Ադրբեջանին ռազմատենչ հռետորաբանության համար և ասել, որ «մենք պատրաստ ենք պատերազմի, քանի որ դասեր ենք քաղել պատմությունից»:

«Պատերազմից խուսափելու լավագույն միջոցը դրան պատրաստ լինելն է: Եթե Ադրբեջանը զգա, որ մենք պատրաստ չենք, զինադադարի ռեժիմի խախտումից հնարավոր չի լինի խուսափել»,- ասաց Սարգսյանը:

Սարգսյանը կրկին խոսել է հայ-թուրքական և ղարաբաղյան գործընթացների շաղկապման մասին, նշելով, որ դա չի օգնելու հակամարտության կարգավորմանը, քանի որ «Թուրքիան չեզոք կողմ չէ»:

Այսպիսով, ՀՀ վարչապետի հայտարարությունները բավականին հատկանշական են թվում: Փաստորեն ասվել է, որ եթե Թուրքիան չհրաժարվի հայ-թուրքական հարաբերությունների կարգավորումը ղարաբաղյան խնդրի հետ շաղկապող իր քաղաքականությունից, ապա Երևանը կդադարեցնի բանակցային գործընթացը: