ՀՀ Ազգային ժողովը շրջանառության մեջ է դրել հայ-թուրքական արձանագրությունների փաթեթը, գլխադասային հանձնաժողով է նշանակվել արտաքին հարաբերությունների մշտական հանձնաժողովը, որը պետք է վերահսկի արձանագրությունների քննարկման և վավերացման գործընթացները խորհրդարանում:

Այս գործընթացին զուգահեռ` ՀՀ նախագահ Սերժ Սարգսյանի հրամանով կառավարությունը մշակել և խորհրդարան է ներկայացրել միջազգային պայմանագրերից հրաժարվելու, դրանք չեղյալ հայտարարելու, ստորագրությունը հետ կանչելու մասին օրինագիծ:

Օրինագիծը ենթադրում է, որ միջազգային պայմանագիր ստորագրող կողմը ցանկացած ժամանակ` մինչև իր ստորագրած պայմանագրի ուժի մեջ մտնելը, իրավունք ունի չդառնալ այդ պայմանագրի մասնակից:

«Ժառանգություն» խմբակցության ղեկավար Ստեփան Սաֆարյանն օրինագիծը կապում է հայ-թուրքական արձանագրությունների հետ: Միևնույն ժամանակ նա զարմանք է հայտնում. «Ինչո՞ւ է նախագահ [Սերժ] Սարգսյանը փորձում դուրս գալ մի համաձայնագրից, որի հետ կապված ինքը խնդիրներ չի տեսնում, և ինչի մասին հայտարարեց Լոնդոնում»:

Լոնդոնի Միջազգային հարաբերությունների թագավորական ինստիտուտում` «Չեթհըմ հաուզում», տեղի ունեցած իր ելույթում նախագահ Սարգսյանն ասել էր. «Որպես Հայաստանի խորհրդարանական մեծամասնություն կազմող կուսակցության ղեկավար` բացառում եմ արձանագրությունների վավերացման տապալումը Հայաստանում, եթե Թուրքիան առանց նախապայմանների վավերացնի արձանագրությունները»։ Նախագահը, սակայն, ընդգծել էր. «Բայց եթե հաստատվեն կասկածները, թե Թուրքիան փորձում է ընդամենը ժամանակ ձգել, մենք ստիպված կլինենք դադարեցնել գործընթացը»։

ԱԺ նախկին նախագահ և նախկին հանրապետական պատգամավոր Տիգրան Թորոսյանը «կոպիտ սխալ է» համարում նախագահի այս հայտարարությունը:

«Անկախ որևէ բանից` խորհրդարանն անկախ մարմին է: Ավելին` պատգամավորն ազատ է իր դիրքորոշումն արտահայտելու մեջ, դա սահմանադրական նորմ է»,- ասում է Թորոսյանը:

Ստեփան Սաֆարյանն «ԱրմենիաՆաուին» ասում է, որ եթե Հայաստանը ցանկանում է դուրս գալ որևէ միջազգային պայմանագրից, ապա կարող էր առաջնորդվել դիվանագիտական հարաբերություններ հաստատելու մասին Վիեննայի կոնվենցիայով, որը ՀՀ-ն վավերացրել է, ինչն իր հերթին ամրագրված է ՀՀ Սահմանադրությամբ:

«Այդուհանդերձ, նախագահի այս քայլը ես համարում եմ թույլ «շանտաժիկ»: Պարզապես, փորձում են դրսում այն տպավորությունն ստեղծել, թե Հայաստանը կարող է դուրս գալ միջազգային պայմանագրից: Նման հակասող քայլերով ՀՀ իշխանությունները ոչ միայն իրենց, այլև Հայաստանն են դնում տհաճ իրավիճակում: Նախագահը հայտարարում է, որ խնդիր չկա, և Հայաստանը երբեք չի դառնա [գործընթացը] տապալող կողմ, մյուս կողմից էլ` սպառնում է, որ կտապալի: Սա շատ լուրջ հակասություն է»,- ասում է «Ժառանգություն» խմբակցության ղեկավարը:

Իսկ կոալիցիոն ուժերը պաշտպանում են գործընթացի առնչությամբ նախագահի դիրքորոշումը և դրվատանքի խոսքեր ասում նրա լոնդոնյան ելույթի առնչությամբ:

ԱԺ փոխնախագահ, հանրապետական Սամվել Նիկոյանն էլ կարծում է, որ Հայաստանը պետք է շարունակի իր նախաձեռնողական քաղաքականությունը նաև հայ-թուրքական հարաբերությունների կարգավորման արձանագրությունների վավերացման փուլում:

Ըստ նրա` հնարավոր է վավերացման երեք տարբերակ. առաջին` որ գործընթացները զուգահեռ ընթանան, երկրորդ`հայկական կողմը սպասում է, որ Թուրքիայի խորհրդարանում այդ գործընթացն ընթանա, և երրորդ`Հայաստանը փորձում է նախաձեռնողական քաղաքականությունը շարունակել վավերացման փուլում: