Հայաստանյան ներքաղաքական կյանքն այս շաբաթ առանձնացավ իշխանական կոալիցիայի ներսում ժամանակ առ ժամանակ ի հայտ եկող հակամարտության հերթական սրացումով: Երեք քաղաքական ուժերից կազմված կոալիցիայի մաս կազմող Հանրապետական-«Բարգավաճ Հայաստան» կուսակցություններն այս անգամ վիճեցին «Բարգավաճի» նախագահ, խոշոր գործարար Գագիկ Ծառուկյանի այն կոշտ հայտարարության պատճառով, թե ՀՀ էկոնոմիկայի հանրապետական նախարար Ներսես Երիցյանն «իր տեղում չէ, չի տիրապետում ո´չ երկրի էկոնոմիկային, ո´չ էլ երկրի տնտեսական վիճակին»:

Ամեն ինչ սկսվել էր դեռ նախորդ շաբաթվա վերջին, երբ մեծահարուստ պատգամավոր Գագիկ Ծառուկյանը, լինելով տեղական «Շանթ» հեռուստաընկերության «Հեռանկար» ծրագրի հյուրը, պատասխանելով վարողի հարցին, թե արդյոք Հայաստանն արդեն հաղթահարե՞լ է համաշխարհային տնտեսական ճգնաժամը, ասաց, որ նման հայտարարություն անող անձը պարզապես չի տիրապետում իրավիճակին (ՀՀ կառավարությունը տնտեսական ճգնաժամը հաղթահարելու մասին հայտարարություններ անում է դեռ տարեսկզբից):

Երկուշաբթի, երբ Ծառուկյանը եկել էր Ազգային ժողով` որպես պատգամավոր մասնակցելու ԱԺ նիստին, իր կարծիքը կրկնեց լրագրողների հետ ճեպազրույցում` միաժամանակ քննադատության ենթարկելով կառավարության կողմից Ազգային ժողով ներկայացված հարկային փոփոխությունների փաթեթը, որն առաջին ընթերցմամբ ԱԺ-ն ընդունել է նախորդ քառօրյայի ընթացքում:

«Այսօր տնտեսական ճգնաժամ է, ճգնաժամն ավարտված չէ: Մենք պետք է հարկերը ոչ թե խստացնենք, այլ թուլացնենք, որոշ օրենքներ էլ սառեցնենք»,- հայտարարեց Ծառուկյանը՝ ավելացնելով, որ ներկայումս աշխարհում դեռ ոչ ոք չի ասել, թե տնտեսական ճգնաժամն ավարտվել է` հակադարձելով Ներսես Երիցյանի ավելի վաղ արած պնդումներին, որ ճգնաժամն ավարտվել է, ու ասաց, որ նախարարն իր տեղում չէ:

Երիցյանի պատասխանը չուշացավ: Հաջորդ օրը նա իր մամուլի քարտուղարի միջոցով, քանի որ գտնվում էր Գերմանիայում, խորհուրդ տվեց Ծառուկյանին գնահատական տալ ԲՀԿ անդամ նախարարներին ու նրանց գործունեությանը: (Վերջին վեց ամիսների ընթացքում «Բարգավաճ Հայաստանը» փոխեց իր երկու նախարարներ` հավանաբար աշխատանքում թերանալու պատճառով: Կոալիցիայի մյուս անդամ կուսակցությունը` «Օրինաց երկիրը», նույնպես փոխեց իր երկու նախարարներին այս շաբաթ, սակայն կուսակցության ղեկավարությունը հայտարարեց, որ գոհ էր իր նախարարների աշխատանքից, և փոփոխությունը պայմանավորված էր կուսակցության ռազմավարական նկատառումներով:)

«Իսկ իմ աշխատանքի գնահատականը կտան Հայաստանի Հանրապետության նախագահը և վարչապետը»,- հայտարարեց Երիցյանը (հայտարարությունը տեղադրված է նույնիսկ նախարարության կայքէջում):

Այնուհետև փոխադարձ վիրավորանքները շարունակվեցին արդեն երկու կուսակցությունների անդամների կողմից:

Մասնավորապես, ԱԺ ԲՀԿ խմբակցության անդամ Նաիրա Զոհրաբյանը հայտարարել էր, որ Երիցյանը դեռ երկար ճանապարհ պիտի անցնի Գագիկ Ծառուկյանին խորհուրդ տալու իրավունքը վաստակելու համար, և իր հերթին առաջարկեց նրան` թուղթ ու գրիչ վերցնել և հրաժարական տալ: Սրան ի պատասխան` ՀՀԿ մամլո քարտուղար Էդուարդ Շարմազանովն էլ Զոհրաբյանին հորդորեց չանցնել կոռեկտության և էթիկայի սահմանները, և «ոտքերն իր վերմակի չափով մեկնել»:

Հեռահար վիրավորանքների այս գործելաոճին ՀՀԿ-ն և ԲՀԿ-ն դիմեցին նաև այն ժամանակ, երբ Ծառուկյանը քննադատեց Հայաստանի ֆուտբոլի ֆեդերացիայի նախագահ, հանրապետական Ռուբեն Հայրապետյանին` անցյալ տարվա հոկտեմբերին Բուրսայում թուրքերի հետ խաղում պարտվելու համար: ԲՀԿ-ն լուրջ տարաձայնություններ ունեցավ նաև Երևանի ավագանու քվոտաների հարցում նոյեմբերին, և այդ ժամանակ կուսակցությունը քննարկում էր նույնիսկ ավագանու իր անդամների մանդատները վայր դնելու հարցը:

Չնայած դրան` ՀՀԿ-ԲՀԿ լարվածությունն ամեն կերպ երկու կուսակցությունների ներկայացուցիչները փորձում են ներկայացել որպես կոալիցիայի ներսում առկա առողջ քննադատության դրսևորում:

Ծառուկյանի մամլո քարտուղար Խաչիկ Գալստյանն «ԱրմենիաՆաուին» ասաց, որ խնդիրը պետք է դիտարկել միայն առողջ քննադատության ոլորտում, և երկու կուսակցությունների միջև հակամարտություն չկա:

ՀՀԿ պատգամավոր Արտակ Զաքարյանն էլ իր հերթին փոխանցեց, որ ՀՀԿ-ի և ԲՀԿ-ի միջև «քաղաքական տարաձայնություններ չկան»:

«Մեր գործընկերության հենց սկզբից էլ եղել են բազմաթիվ խնդիրների շուրջ հակասություններ, անհամաձայնություններ, սակայն սա նշանակում է, որ կոալիցիոն ձևաչափում բազմակարծություն կա»,- նշեց Զաքարյանը: