Select edition
English
Հայերեն
տեղական լուրեր, գլոբալ լսարան
Ուրբաթ, փետրվարի 10, 2012 Թարմացված է 02:03
Որոնել
Միավորվե´նք կլոր սեղանի շուրջ. «Ժառանգության» նախաձեռնությունը դժկամորեն են ընդունել իշխանամետ կուսակցությունները
Սաֆարյանը հավատում է, որ Հայաստանի առջև ծառացած մարտահրավերները կստիպեն բոլորին միանալ «Ժառանգության» նախաձեռնությանը: Մինչդեռ, մարտի 30-ին ներկայացրած այս առաջարկությունը, որը, ըստ «Ժառանգության», նոր հավասար դաշտ պիտի ստեղծի ընդդիմադիր և կոալիցիոն ուժերի համար, առանձնակի ոգևորությամբ չի ընդունվել: ՀՀԿ կուսակցության մամլո խոսնակ Էդուարդ Շարմազանովը խորհուրդ տվեց «նոր հեծանիվներ չհորինել» և «չմոռանալ, որ երկխոսություն սկսելու գաղափարը պատկանում է ոչ թե «Ժառանգություն» կուսակցությանը, այլ հանրապետության նախագահ Սերժ Սարգսյանին, ով արդեն երեք անգամ նման հանդիպումներ իրականացրել է»: «Եթե նախագահը համարի, որ պետք է կլոր սեղան նորից հրավիրել, կհրավիրի, մենք էլ, ինչպես միշտ, կառաջարկենք բոլոր քաղաքական ուժերին մասնակցել»,- ասում է Շարմազանովը: Մինչդեռ վերջին մեկուկես տարվա ընթացքում ՀՀ նախագահի նախաձեռնած երեք խորհրդակցություններին` ղարաբաղյան հիմնախնդրի, տնտեսական ճգնաժամի, հայ-թուրքական հարաբերությունների վերաբերյալ, ընդդիմադիր երկու հիմնական ուժերը` «Ժառանգությունն» ու Հայ ազգային կոնգրեսը չեն մասնակցել: Իսկ «Ժառանգությունն» առաջարկում է ընդդիմադիր և իշխանական ուժերի համամասնորեն հավասար կլոր սեղան ստեղծել, որը, ինչպես ասված է հայտարարության մեջ, «նախադրյալներ կստեղծի պատերազմական գործողությունների վերսկսման դեպքում ներհասարակական-ներքաղաքական միասնության ապահովման և համախմբված ուժերով հակառակորդին դիմակայելու համար»: Նման արձագանքը, ըստ ԱԺ «Ժառանգություն» խմբակցության ղեկավար Ստեփան Սաֆարյանի, սպասելի էր, քանի որ նախկինում էլ «Ժառանգության» նման առաջարկությունները տապալվել են: «Սակայն, ես հավատում եմ, որ այս անգամ իրավիճակը կմղի միանալ գաղափարին, քանի որ մտահոգություններ լսվել են բոլորի կողմից»,- «ԱրմենիաՆաուին» ասում է Սաֆարյանը: Այդուհանդերձ, առաջարկին դեռ չեն շտապում արձագանքել անգամ ընդդիմադիրները. ՀԱԿ-ի համակարգող Լևոն Զուրաբյանն «ԱրմենիաՆաուին» ասաց, որ դեռ ծանոթ չէ հայտարարությանը, ՀՅԴ խմբակցության պատգամավորները ևս խուսափեցին որևէ կարծիք արտահայտելուց: «Ժառանգությունը» նաև հույս է հայտնում, որ նախաձեռնությունը չի սահմանափակվելու միայն հայաստանյան ուժերի ներգրավմամբ, ըստ հայտարարության` այն կընդգրկի նաև Արցախի, սփյուռքի քաղաքական ուժերին ու քաղաքացիական առանցքային դերակատարներին և Մայր եկեղեցու ներկայացուցիչներին:
Other Articles in Քաղաքականություն
|
 |
ԱրմենիաՆաուի էջերում
ՎԵՐԵՎ | Կատեգորիաներ | Resources | About | Site map | ԱրմենիաՆաուի Հաշիվ |
|---|---|---|---|---|
Readers' comments
Post a comment
Comments are welcomed and encouraged. However, comments not pertaining to the topic or containing slander or offensive language will be deleted. You have to be registered to be able leave your comment. Sign in or Register now for free.