Հայաստանի արմատական ընդդիմությունը հեգնել է Ռոբերտ Քոչարյանի հայտարարությունը, որում նախկին նախագահն ասել է, թե ցանկության դեպքում կարող է հեշտությամբ վերադառնալ մեծ քաղաքականություն, ինչպես նաև քննադատել է նրան նախկին պետական գործչին անվայել բառապաշար օգտագործելու համար:

ՀԱԿ-ի ներկայացուցիչներից Առաքել Սեմերջյանն ուրբաթ «ԱրմենիաՆաուին» հաղորդեց, որ Քոչարյանն այդ հայտարարությամբ ապացուցում է իր խուճապի մատնվելը, քանի որ կանխազգում է, որ կարող է կանգնել Հաագայի միջազգային քրեական դատարանի առջև:

(Առաջին նախագահ Լևոն Տեր-Պետրոսյանի գլխավորած ընդդիմությունը Քոչարյանին է պատասխանատու համարում 2008 թ. հետընտրական ցույցերը բռնի ուժով ցրելու համար, որի հետևանքով զոհվեցին տասը, վիրավորվեցին բազմաթիվ մարդիկ: Քոչարյանի վարչակարգը և նրան հաջորդող Սերժ Սարգսյանը հերքել են մեղադրանքները և պնդել, որ 2008 թ. մարտի 1-2-ին ուժը կիրառվել է պետական հեղաշրջման փորձը կանխելու համար:)

Հինգշաբթի «Մեդիամաքս» գործակալությունը տարածել է Քոչարյանի հայտարարությունը, որում ընդդիմության ներկայացուցիչներին դիմելիս Քոչարյանը վիրավորական արտահայտություններ և փողոցային լեզու է օգտագործել: ՀԱԿ-ի ներկայացուցիչների կարծիքով`այդպիսով նա ապացուցել է ՀՀ առաջին նախագահ Լևոն-Տեր Պետրոսյանի կողմից ապրիլի 6-ին ընդդիմության վերջին հանրահավաքի ժամանակ հնչեցրած մեղադրանքները:

Հիշեցնենք, որ հանրապետության առաջին նախագահը հանրահավաքում իր ելույթի ժամանակ վիրավորական ու ժարգոնային արտահայտություններով էր դիմել Ռոբերտ Քոչարյանին` ներողություն խնդրելով, որ ստիպված է խոսել «վերխուշկեքի» դասական լատիներենով», քանի որ, ըստ նրա` «նրանք ուրիշ լեզու, այդ թվում` Հայաստանի պետականը, չգիտեն»։

Թեև Ռոբերտ Քոչարյանը նշել է, որ երբեք չի հուզել, թե իր մասին ի´նչ է մտածում ընդդիմությունը, բայց, ավանդույթի համաձայն, նա առաջին նախագահի հայտարարություններին ոչ պակաս վիրավորական արտահայտություններով համարժեք պատասխան է տվել:

Քոչարյանն իր հայտարարության մեջ նաև ժխտել է ընդդիմության մեղադրանքները այն մասին, թե ինքն առանձնազրույց ունենալու նպատակով Փարիզում հանդիպել է ՀՀ նախագահ Սերժ Սարգսյանի հետ, որտեղ նրան ասել է իր` երրորդ անգամ նախագահ ընտրվելու մտադրության մասին:

Ընդդիմությունը նաև հայտարարել է, որ Քոչարյանը վերջերս Դուբայում հանդիպել ու զրուցել է «քրեաօլիգարխիկ համակարգի պարագլուխների» հետ և կոչ արել հատուկ գործողություններ մշակել, քանի որ շուտով Սերժ Սարգսյանը կզրկվի իշխանությունից, իշխանության կգա Տեր-Պետրոսյանը, և նրանց ձեռքից կխլեն իրենց հարստությունը:

Քոչարյանը սրան պատասխանել է. «Ի դեպ, Դուբայում վերջին անգամ ես եղել եմ պաշտոնական այցով` երեք տարի առաջ: Իսկ Փարիզում մարտի սկզբին նախագահ Սարգսյանի հետ ընդհանրապես չեմ հանդիպել: Բամբասանքներով ապրող նախկին նախագահը պարզապես խղճուկ է»: