ԱԺ «Ժառանգություն» և ՀՅԴ խմբակցությունները հունվարի 12-ին որպես օրենսդրական նախաձեռնություն խորհրդարան օրինագծերի փաթեթ են ներկայացրել` փոփոխություններ կատարելու ընտրական օրենսգրքում, «ՀՀ Ազգային ժողովի կանոնակարգ-օրենքում» և «Հայաստանի սահմանադրական դատարանի մասին» օրենքում, որը նախատեսում է ընտրությունների գործող խառը համակարգից անցում կատարել 100%-ոց համամասնական ընտրակարգի:

100%-ոց համակարգի անցնելու թեման անսպասելիորեն արդիական դարձավ այն բանից հետո, երբ 2011 թ. դեկտեմբերի 27-ին երկու ընդդիմադիր խորհրդարանական խմբակցություններ հանդես եկան համատեղ հայտարարությամբ` առաջարկելով հրաժարվել մեծամասնական համակարգից և անցնել 100%-ոց համամասնականի: Բազմաթիվ կուսակցություններ ողջունեցին առաջարկությունը, ի թիվս որոնց ընդդիմադիր Հայ ազգային կոնգրեսը, «Ազատ ժողովրդավարներ» կուսակցությունը, Ժողովրդական կուսակցությունը, Հայաստանի ռամկավար-ազատական կուսակցությունը, Ազգային ժողովրդավարական կուսակցությունը, ինչպես նաև քաղաքացիական խմբեր և մտավորականության բազմաթիվ ներկայացուցիչներ:

Նման առաջարկությամբ երկու կուսակցություններն առաջին անգամ հանդես եկան 2010 թ. օգոստոսի 4-ին` ընտրական օրենսգրքում լրացուցիչ փոփոխություններ կատարելու նախաշեմին: Սակայն խորհրդարանական մեծամասնությունը չընդունեց առաջարկությունները և չաջակցեց արտախորհրդարանական ընդդիմությունը: 2011 թ. գարնանն ընդունվեց նոր ընտրական օրենսգիրքը, և ապա խաղաղություն տիրեց` մեծ մասամբ պայմանավորված իշխող կոալիցիայի և ՀԱԿ-ի միջև երկխոսությամբ:

Սակայն երկխոսությունը չստացվեց, և արդյունքում Կոնգրեսի առջանորդ Լևոն Տեր-Պետրոսյանը անցյալ տարվա վերջին կենտրոնացավ ընտրական օրենսգրքի վրա և առաջարկեց դրանում նոր փոփոխություններ կատարել, մասնավորապես, համամասնական ընտրակարգի անցման մասին:

Ընդդիմության ներկայացուցիչները, մասնավորապես, Կոնգրեսի նախկին անդամ, այժմ լիբերալ «Ազատ ժողովրդավարներ» կուսակցության անդամ, ՀՀ նախկին արտգործնախարար Ալեքսանդր Արզումանյանը, կարծում են, որ 131 մանդատից 41 մեծամասնականը հնարավորություն են տալիս իշխանությանը գրեթե 30-տոկոսանոց առավելություն ստանալ: Դա նախօրոք զրկում է ընդդիմությանը խորհրդարանում մեծամասնություն լինելու հնարավորությունից:

100%-ոց համամասնական ընտրակարգին անցնելը չի բխում ՀՀ քաղաքացիների շահերից, հայտարարել է ԱԺ ՀՀԿ պատգամավոր Մանվել Բադեյանը: Նրա խոսքով` «Ժառանգություն» և ՀՅԴ կուսակցությունները, իրենց շարքերում վառ անհատականություններ չունենալով, փորձում են «իրենց կողմը քաշել վերմակը»: Պատգամավորը նաև կարծիք է հայտնել, որ նախաձեռնությունը սահմանափակում է մարդու ընտրվելու իրավունքը, ինչպես նաև զրկում է մարդկանց իրենց ընտրատարածքից պատգամավոր ընտրելու իրավունքից:

Փոփոխությունները նախաձեռնողների փաստարկներից մեկն էլ այն է, որ արդեն երկար տարիներ ՀՀ խորհրդարանում մեծամասնական ընտրատարածքներով ընտրվում են հիմնականում օլիգարխներ և անում են դա հիմնականում ընտրակաշառքների հաշվին: «Լրագիր» թերթը նշում է, որ նախագահ Սերժ Սարգսյանը հայտարարել է այն մասին, որ մտադիր չէ օլիգարխներին խորհրդարան թույլ տալ և ընդգրկել նրանց Հանրապետական կուսակցության ցուցակում: Թերթի կարծիքով` մեծամասնական ընտրատարածքների բացակայությունը այդ տեսանկյունից ձեռնտու է նաև Սերժ Սարգսյանին: Այդ առաջարկությունը կարող է նույնիսկ ընդունվել` հաշվի առնելով այն, որ այդ հարցում Սերժ Սարգսյանի և ընդդիմության շահերը կարող են համընկնել:

Ըստ էության բոլորը նշում են կոալիցիոն մյուս կուսակցության` «Բարգավաճ Հայաստանի» դիրքորոշման կարևորությունը, որը նույնպես պակաս միամանդատ պատգամավորներ չունի: Խորհրդարանում թվաքանակով երկրորդ կուսակցությունը դեռ չի արտահայտել իր վերաբերմունքը օրինագծի նկատմամբ: