Անցյալ շաբաթ տեղի ունեցան Հայաստանի երկու ընդդիմադիր ուժերի առաջնորդների հանդիպումները, որոնք հասկանալով, որ առանց միավորվելու քիչ շանսեր ունեն խորհրդարանում բավարար թվով տեղեր զբաղեցնելու, չեն կարողանում դեռևս շփման եզրեր գտնել:

Միավորման համար հենք կարող է ծառայել ընտրական օրենսգրքում փոփոխությունները` 100-տոկոսանոց համամասնական ընտրակարգի անցման առաջարկությունը: Ընդդիմադիր կուսակցությունների` «Ժառանգության» և ՀՅԴ-ի խմբակցություններն արդեն խորհրդարան են ներկայացրել համապատասխան օրինագիծը:

«Ազատություն» ռադիոկայանի հաղորդմամբ` ուրբաթ «Ժառանգություն» կուսակցության փոխնախագահ Ռուբեն Հակոբյանն ու պատգամավոր Արմեն Մարտիրոսյանը հանդիպել են «Ազատ դեմոկրատներ» կուսակցության վարչության նախագահ Խաչատուր Քոքոբելյանի և այդ կուսակցության վարչության անդամ Արարատ Զուրաբյանի հետ: («Ազատ դեմոկրատները» ընդդիմադիր կուսակցություն է, որը ստեղծվել է անցյալ տարի գլխավոր ընդդիմադիր ՀԱԿ-ի նախկին համախոհների կողմից, ի թիվս որոնց` նախկին արտգործնախարար Ալեքսանդր Արզումանյանի: Կուսակցությունը ծրագրում է նաև մասնակցել այդ տարի մայիսին կայանալիք խորհրդարանական ընտրություններին:)

Հանդիպում է եղել նաև ընդդիմադիր Հայ ազգային կոնգրեսի ղեկավար անձնակազմի հետ: Մարտիրոսյանի խոսքով` հանդիպումները զուտ աշխատանքային են եղել, իսկ քննարկումների թեման խառը ընտրահամակարգից 100-տոկոսանոց համամասնական ընտրակարգին անցնելու նախաձեռնությունն էր:

Հայկական մամուլն արդեն գրում է, որ եթե նույնիսկ իշխող Հանրապետական և «Բարգավաճ Հայաստան» կուսակցությունները կասեցնեն ընտրական օրենսգրքում փոփոխությունները, և դրանք չընդունվեն, ապա օրինագիծն ընդունելու ընդդիմադիր ուժերի համատեղ աշխատանքը կարող է օգնել նրանց հաղթահարելու երկարամյա առճակատումը:

Հիմնական ընդդիմադիր ուժերը` ՀԱԿ-ը և ՀՅԴ-ն, ըստ էության, բացառում են իրենց միջև երկխոսությունը`18-ամյա վաղեմության դեպքերի պատճառով, երբ Հայոց համազգային շարժում կուսակցությունը (այժմ` ՀԱԿ-ի հիմքը) նախագահ Լևոն Տեր-Պետրոսյանի ղեկավարությամբ, զանգվածային ճնշումներ իրականացրեց դաշնակցականների նկատմամբ, ինչի հետևանքով ներկայիս գրեթե ողջ ՀՅԴ ղեկավարությունը հայտնվեց ճաղերի հետևում: Նրանց ազատ արձակեցին միայն Հայաստանում Ռոբերտ Քոչարյանի իշխանության գալուց հետո, և այդ օրվանից ՀՅԴ-ն լոյալ է Քոչարյանի և անհաշտ Տեր-Պետրոսյանի նկատմամբ:

Կհաջողվի՞ արդյոք հաղթահարել այդ հակասությունները: Հաշտեցման առաքելությունը բազմիցս ստանձնել է «Ժառանգություն» կուսակցությունը: Նրա առաջնորդ, ՀՀ առաջին արտգործնախարար Րաֆֆի Հովհաննիսյանը բազմիցս հայտարարել է, որ ընդդիմությունը պետք է միավորվի` չնայած հակասություններին: Սակայն առայժմ նրա միջնորդական գործողությունները հաջողությամբ չեն պսակվել:

Ընդդիմության միավորումը, միևնույն ժամանակ, կարող է փոխել Հայաստանի քաղաքական ուժերի դասավորությունը: Արմեն Մարտիրոսյանը «Ազատություն» ռադիոկայանին ակնարկել է, որ բանակցությունների արդյունքում «մոտավոր, շատ մոտավոր պայմանավորվածություններ են ձեռք բերվել»: Նա նշել է, որ ծրագրվում է քաղաքական համաժողով` «Ժառանգության» և ՀՅԴ-ի առաջարկությանն աջակցած ուժերի մասնակցությամբ: Իսկ նրանց թվում է նաև Հայ ազգային կոնգրեսը:

Մարտիրոսյանը չի կարծում, թե տվյալ նախաձեռնության շուրջ քննարկումները կարող են հանգեցնել ընդդիմադիր բլոկի ստեղծմանը, սակայն դաշինքի հնարավորություն է տեսնում համագործակցության առումով: Մյուս կուսակցությունների ներկայացուցիչները նույնպես բացառում են նախընտրական ընդդիմադիր բլոկի ստեղծումը: