Կոոալիցիոն «Բարգավաճ Հայաստան» կուսակցության խորհրդարանական խմբակցությունը միացել է ընդդիմադիր ՀՅԴ և «Ժառանգություն» խմբակցությունների նախաձեռնությանը՝ ԱԺ-ում խորհրդարանական լսումներ հրավիրելու համամասնական և մեծամասնական ընտրակարգերի թեմայով:

ԱԺ «Բարգավաճ Հայաստան» խմբակցության քարտուղար Արամ Սաֆարյանը ստորագրել է խորհրդարանի նախագահ Սամվել Նիկոյանին ուղղված դիմումի տակ, որով խնդրում են խորհրդարանական լսումներ հրավիրել` ամբողջությամբ համամասնական ընտրակարգի անցնելու համար:

Սաֆարյանն ասում է, որ դեռևս 2007-ի գարնանն իրենց կուսակցության կողմից ընդունված ծրագրով միաձայն քվեարկել են 100-տոկոսանոց համամասնական ընտրակարգին անցնելու սկզբունքի օգտին:

«Կուսակցության քաղաքական խորհրդում և խորհրդարանական խմբակցությունում այս հարցի վերաբերյալ դեռ քննարկումներ չեն եղել և որոշում չի ընդունվել: Մեր ձգտումը` միանալ այս առաջարկին, պայմանավորված է մեր ցանկությամբ` հասարակության ուշադրությունը հրավիրել այս հարցի վրա, լսել կողմ և դեմ կարծիքները և նոր դրանից հետո հարցը դնել քաղաքական քննարկման»,- ասում է Սաֆարյանը:

Առաջարկվում է ազատ ու արդար ընտրությունների կազմակերպման և վերահսկման նպատակով ընտրական օրենսգրքում վերացնել մեծամասնական ընտրակարգը` անցում կատարելով 100-տոկոսանոց համամասնական ընտրակարգի:

«Քաղաքական կուսակցությունը, եթե իսկապես քաղաքական կուսակցություն է և ունի գաղափարական հենք, անպայման ձգտել է և ձգտելու է համամասնական ընտրակարգով առավելագույն տեղերի: Մնացած տարբերակները, որպես կանոն, քննարկում են այն ուժերը, որոնք հիմնականում մտածում են` ոնց պետք է Ազգային ժողովի պատգամավոր դառնան փողի իշխանությամբ, վարչական լծակով կամ այլ ոչ ժողովրդավարական ձևերով»,- ասում է ՀՅԴ խմբակցության անդամ Արծվիկ Մինասյանը:

Ազգային ժողովի 131 պատգամավորներից 90-ը գործող ընտրական օրենսգրքով ընտրվում են համամասնական, 41-ը` մեծամասնական ընտրակարգով: