«Ազատ դեմոկրատներ» կուսակցությունը, որն ստեղծել են անցյալ տարի Հայաստանի գլխավոր ընդդիմադիր դաշինքի մի խումբ նախկին անդամներ, հավանական է համարում, որ մայիսի խորհրդարանական ընտրություններին կմասնակցի ընդդիմադիր «Ժառանգություն» կուսակցության հետ դաշինք կազմած:

«Ազատ դեմոկրատներ» կուսակցության անդամ Ալեքսանդր Արզումանյանն ասում է, որ այս պահին տարբեր ձևաչափերով բանակցում են «Ժառանգության» հետ հնարավոր դաշինքի շուրջ: Ինչպիսի՞ն կլինի դաշինքի ձևաչափը` դեռևս հայտնի չէ:

«Ժառանգության հետ ենք բանակցում, որովհետև կա գաղափարական հոգեհարազատություն: Դա է թերևս պատճառը, որ մենք գաղափարական առումով որևէ խնդիր չունենք և շատ ակտիվ համագործակցում ենք հարցերի շատ լայն սպեկտրով: Մենք վստահ ենք, որ միասնական ենք գնալու ընտրություններին` կեղծիքները բացառելու, ընդհանուր դիտորդներ, վստահված անձինք ներկայացնելու առումով»,- ասում է Արզումանյանը, որը 1996-1998 թթ. Հայաստանի արտգործնախարարն է եղել և աջակցել առաջին նախագահ Լևոն Տեր-Պետրոսյանին 2008 թ. նախագահական ընտրություններում:

«Ժառանգություն» խմբակցության պատգամավոր Ստյոպա Սաֆարյանը «ԱրմենիաՆաուին» ասում է, որ այս պահին «Ազատ դեմոկրատներ» կուսակցության հետ բանակցությունները շարունակվում են:

«Բազմաթիվ խնդիրների շուրջ մեզ հետ համամիտ են` խորհրդարանական կառավարում, ԱԺ 100 տոկոսանոց համամասնական ընտրակարգ... բայց ամեն ինչ շատ ավելի պարզ կլինի, երբ «Ազատ դեմոկրատները» հրապարակեն իրենց ծրագիրը»,- ասում է Սաֆարյանը:

«Ազատ դեմոկրատները» մյուս բոլոր ընդդիմադիր ուժերի հետ պատրաստվում են համագործակցել այլ ձևաչափերով: Հայ ազգային կոնգրեսի հետ հնարավոր դաշինք կազմելու մասին Արզումանյանն ասում է, որ դա նման կլիներ «նույն գետը երկու անգամ մտնելուն»:

«Ազատ դեմոկրատների» գերակշիռ մասը ՀՀՇ նախկին անդամներ են: 2008 թ. նախագահական ընտրությունների ժամանակ նախագահի թեկնածու Լևոն Տեր-Պետրոսյանի 11 նախընտրական շտաբերից 7-ը ղեկավարել են «Ազատ դեմոկրատների» անդամներ: Ինքը` Արզումանյանը, ղեկավարել է Լևոն Տեր- Պետրոսյանի նախընտրական շտաբի աշխատանքները: ՀՀՇ-ն պաշտոնապես լքել է 2011-ի օգոստոսին, երբ ՀՀՇ-ական ազատական գաղափարախոսությունը նահանջ ապրեց:

«Ցավոք, ՀՀՇ-ն այսօր վերածվել է ոչ թե առանձին կառույցի, այլ Հայ ազգային կոնգրեսին սպասարկող օժանդակ կառույցի»,- ասում է նա:

«Ազատ դեմոկրատները» կողմնակից են երկրի կառավարման խորհրդարանական համակարգին:
«2013-ին չարժի ունենալ նախագահի թեկնածու. եթե լինի մեկը, ով կհայտարարի, թե գալիս է կառավարման համակարգը փոխելու ծրագրով, մենք նրան կպաշտպանենք»,- ասում է նա:

Արզումանյանը հերքում է մամուլում տարածված այն լուրերը, թե «Սիվիլիթաս» հիմնադրամում տեղի է ունեցել երեք նախկին արտգործնախարարների`Ալեքսանդր Արզումանյանի, Րաֆֆի Հովհաննիսյանի և Վարդան Օսկանյանի հադիպումը, որի ընթացքում էլ քննարկվել են դաշինք կազմելու հնարավորությունները:

«Վարդան Օսկանյանին հանդիպել եմ վերջերս, երբ հրավիրված էի «Սիվիլիթասում» կազմակերպված քննարկմանը: Օսկանյանը 2008 թ. մարտի 1-ի կարևորագույն պատասխանատուներից մեկն է»,- ասում է նա: