Զբաղվածության պետական ծառայության տվյալներով, որոնց մասին հինգշաբթի հաղորդեց գործակալության տնօրեն Սոնա Հարությունյանը, Հայաստանում ամենաքիչ պահանջարկ ունեցող մասնագիտությունները ինժեների և բուժքրոջ աշխատանքներն են, իսկ ամենամեծ պահանջարկ ունեցողները` շինարարինը և սպասարկման ոլորտի աշխատողինը:

Ծառայության տվյալներով` 2009 թ. Հայաստանում գրանցվել է 99 300 գործազուրկ (2008-ին` 74 700, համաշխարհային ֆինանսական ճգնաժամի պատճառով գործազուրկների թիվը երկրում 7,1% տոկոսով աճել է), որոնցից 72%-ը կին են, իսկ 21%-ը` երիտասարդներ: Անցյալ տարվա ընթացքում 9400 գործազուրկ աշխատանք ստացան, ևս 4 960-ը, այսպես կոչված, ժամանակավոր աշխատանքով ապահովվեցին (փողոցների, ձյան մաքրում և այլն):

Հայաստանում մոտ 30 000 մարդ ստանում է ամսական 11 000 դրամ (29 դոլար) գործազրկության նպաստ: Գործակալությանը դիմած քաղաքացիները մի քանի ամիս նպաստ են ստանում: Այդ ընթացքում կազմակերպությունը փորձում է նրանց համար աշխատանք գտնել: Եթե գործազուրկ քաղաքացին երեք անգամ հրաժարվում է առաջարկվող աշխատանքից, նրա նպաստը դադարեցվում է: 2009 թ. ՀՀ կառավարությունը գործազրկության նպաստի համար 1,4 մլրդ դրամ (3,7 մլն դոլար) է հատկացրել:

Հայաստանում գործազրկության իրական պատկերը դժվար է որոշել, քանի որ ցանկացած մարդ, ով սեփական հող ունի, այլևս գործազուրկ չի համարվում:

Մարզերում թափուր աշխատատեղերի մեծ մասը նույնպես բաժին է ընկնում շինարարներին, ուսուցիչներին, բժիշկներին, հաշվապահներին և մատուցողներին: Սակայն, ըստ Հարությունյանի, այդ աշխատատեղերը դանդաղ են լրացվում երկու հիմնական պատճառով` համապատասխան որակավորման բացակայության և առաջարկվող ցածր աշխատավարձի: