Հայաստանի փոքր քաղաքներում խաղատների բիզնեսի զարգացմանն առնչվող օրենքի նախագիծը ոչ միանշանակ է ընդունվում տարբեր ոլորտների մասնագետների կողմից. ոմանք կարծում են, թե հիմնական հանգստյան գոտի հանդիսացող քաղաքները կկորցնեն իրենց դերակարությունը որպես այդպիսին, մյուսների կարծիքով` նախաձեռնությունը կխթանի Հայաստանում զբոսաշրջության զարգացումը:

Այդ նախագծի համաձայն` 2013 թվականի հունվարի 1-ից խաղատներ կարող են գործել միայն Ծաղկաձորում (Կոտայքի մարզ), Ջերմուկում (Վայոց ձորի մարզ) և Սևանում (Գեղարքունիքի մարզ):

«Մենք կանգնում ենք սպորտի, հանգստի և առողջության ոլորտում կարևոր դերակատարություն ունեցող մեր փոքրիկ քաղաքների կործանման վտանգի առջև: Չեն կարող նույն տեղում բնակվել և´ առողջանալու համար մեկնած մարդը, և´ խաղամոլը»,- չորեքշաբթի մամուլի ասուլիսի ժամանակ ասաց ՀՀ աշխատանքի և սոցիալական հարցերի նախարարի նախկին տեղակալ Կարինե Հակոբյանը: (ԱԺ քառօրյա նիստերի օրակարգում ընդգրկված է «Շահումով խաղերի և խաղատների մասին» ՀՀ օրենքում փոփոխություններ նախատեսող նախագիծը:)

Սակայն ՀՀ ֆինանսների փոխնախարար Վարդան Արամյանը և ԱԺ տնտեսական հարցերի մշտական հանձնաժողովի նախագահ Վարդան Այվազյանը չեն տեսնում այդ վտանգը և կարծում են, որ այս քայլը լավագույնս կնպաստի տուրիզմի զարգացմանը Հայաստանում:

Նրանք օրինակներ էին բերում արտասահմանյան երկրներում խաղատների շնորհիվ տուրիզմի զարգացման վերաբերյալ` անտեսելով, որ այդ երկրներում խաղատները կառուցվում են ոչ թե բնակավայրերին մոտ, այլ ամայի տարածքներում:

«Մենք ընդամենն ուզում ենք ապահովել տարածքային զարգացման համաչափությունը և մշակել վերահսկողության արդյունավետ մեխանիզմներ»,- ավելացրեց Արամյանը:

Թե այդ ծրագիրը որքանով կգործի` պարզ չէ, համենայն դեպս, ըստ փոփոխությունների նախատեսվում է վերացնել խաղատներից գանձվող հաստատագրված վճարները` փոխարենը բարձրացնելով դրանց համար սահմանված տարեկան պետական տուրքի չափը`400 մլն դրամից (1 մլն 66 հազար դոլար) հասցնելով 1 մլրդ դրամի (2 մլն 666 հազար դոլար):