Այսօր (մարտի 10-ին) Երևանում անցկացված ֆորումի ժամանակ մասնագետները զգուշացրել են, որ վերջին տարիներին Հայաստանի հասարակության բոլոր շրջանակներում մեծ տարածում ձեռք բերած բջջային հեռախոսները կարող են բացասական ազդեցություն ունենալ երեխաների վրա:

Մասնագետներին շատ են անհանգստացնում հեռուստացույցով անընդհատ գովազդվող SMS ծանոթությունները և քվեարկությունները, ինչպես նաև այն հանգամանքը, որ երեխաները դասերի ընթացքում բջջայինները չեն անջատում և խանգարում են դասերը:

Ֆորումին մասնակցել են երեխաների խնդիրներով զբաղվող ՀԿ-ների ներկայացուցիչներ, կրթության և գիտության, աշխատանքի և սոցիալական հարցերի նախարարությունների և մարզպետարանների կրթության բաժինների աշխատակիցներ:

Բջջային օպերատոր «Արմենտել» ընկերության հանրային կապերի պատասխանատու Անուշ Բեղլոյանն ասում է, որ ընկերության անցկացրած ոչ ֆորմալ ուսումնասիրության արդյունքներով` Երևանի դպրոցականների 80 տոկոսից ավելին բջջային հեռախոս ունի:

«Դպրոցների տնօրենների մի մասը կարծում է, որ պետք է դպրոցներում ընդհանրապես արգելել բջջայինները, մյուսների կարծիքով`դրանք պետք է դասերի ժամանակ անջատել, ոմանք էլ առաջարկում են դպրոցում դարակներ տեղադրել, որտեղ երեխաները կպահեն իրենց բջջայինները»,- ասում է ֆորումի կազմակերպիչ «Երեխաների աջակցության կենտրոն» հիմնադրամի տնօրեն Միրա Անտոնյանը:

Համաձայն մասնագետների` բջջային ունեցող երեխան դառնում է խոցելի հատկապես կողմնակի անձանց միջամտության տեսանկյունից:

Մասնագետները կարծում են, որ տվյալ պարագայում ամենաճիշտը երեխաներին և ծնողներին բջջային հեռախոսի էթիկետին ծանոթացնելն է, քանի որ այս պարագայում վերահսկողության մեխանիզմներ չկան:

Օրինակ` «Արմենտել» ընկերությունը մշակել է խարտիա բջջային կապից օգտվելու էթիկայի վերաբերյալ և պատրաստվում է առաջիկայում Հայաստանի մարզերի դպրոցներում կազմակերպել բաց դասեր խարտիային ծանոթացնելու համար: