Ռուսաստանում երաշտը պատճառ է դարձել Հայաստանում հացի գների 20-25%-ով բարձրացման: Ըստ տնտեսագետների` ցորենից պատրաստված սննդամթերքների ավելի մեծ թանկացումներ են սպասվում, քանի որ Ռուսաստանում, որտեղից ներմուծվում է Հայաստանի ցորենի պահանջարկի մոտ 80 տոկոսը, վերջին 120 տարիների ընթացքում ամենածանր երաշտն է:

Սակայն, սպառողների իրավունքների պաշտպանները վստահեցնում են, որ արդեն իսկ սկսված թանկացումներն անհիմն են, քանի որ ալյուրի բավական պաշար կա բավարարելու պահանջարկը, և գների վրա դա չպետք է ազդեր, այդուհանդերձ, աշնան բերքից հետո պաշտոնյաները ակնկալում են մինչև 30 տոկոս գնաճ:

Երևանի և մարզերի խանութներում վերջին մեկ շաբաթում հացի գինը բարձրացավ 10-20 դրամով, իսկ ալյուրի պարկի գինը` մոտ 2000 դրամով:

Մարատ Սեդրակյանը, ով հացի սեփական արտադրամաս ունի, ասում է, որ իրենք ստիպված են գները բարձրացնել, քանի որ ալյուրի մեծածախ գները բարձրացել են:

«Մեկ օր առաջ ալյուրը գնեցի 10200 դրամով (27 դոլար), այնինչ դրանից մեկ շաբաթ առաջ նույն 50 կգ պարկը 8000 դրամ էր (21 դոլար)»,- «ԱրմենիաՆաուին» ասում է Սեդրակյանը:

Մինչդեռ գների բարձրացման հիմնական պատճառը, ըստ տնտեսագետ, կենտրոնական բանկի նախկին նախագահ Բագրատ Ասատրյանի, ոչ թե Ռուսաստանի եղանակային պայմաններն են, այլ Հայաստանի տնտեսության մոնոպոլիզացիան:

«Այստեղ գործում է մեկ տրամաբանություն. եթե միջազգային շուկայում գները բարձրանում են, ապա դրանք բարձրանում են նաև Հայաստանում, եթե միջազգային գներն իջնում են, Հայաստանում, միևնույն է, բարձրանում են»,- «ԱրմենիաՆաուին» ասում է Ասատրյանը:

Ըստ Ասատրյանի` 2008-2009-ի ընթացքում միջազգային շուկայում գներն իջել են մոտ 50 տոկոսով, մինչդեռ Հայաստանում նման գնանկում տեղի չի ունեցել:

«…քանի որ ներկրումը և ողջ տնտեսությունը մոնոպոլիզացված են ու կենտրոնացված մի քանի անձանց ձեռքում»,- բացատրում է տնտեսագետը:

Հայաստանի ցորենի ներքին պահանջարկի շուրջ 60%-ը ներմուծվում է, որն իրականացնում են երկու ընկերություններ` «Մանանա Գրեյնը» և պատգամավոր Սամվել Ալեքսանյանին պատկանող «Ալեքս Գրիգը», և տնտեսագետները վստահ են, որ այս շուկան մոտ 50 տոկոսով գրաված «Ալեքս Գրիգը» պարզապես գերշահույթներ է ստանում:

Այս տարի անբարենպաստ եղանակի պատճառով Հայաստանում 17-21 տոկոսով բարձրացել են նաև բանջարեղենի ու մրգերի գները: