Քանդվել է Թուրքիայի Մալաթիա քաղաքի հայկական գերեզմանատանը գտնվող «Վերջին աղոթք» մատուռը, որը ստիպել է թուրքահայերին քայլեր ձեռնարկել երկրի վտանգված` պատմական արժեք ներկայացնող վայրերի պահպանության ուղղությամբ:

«Ողջ Անատոլիայում սփռված էին հին գերեզմանատներ, սակայն նրանց վրայով կամ ճանապարհներ են գցվել, կամ նրանց վրա նոր շինություններ կառուցվել: Դրանց մեծ մասն այլևս հնարավոր չէ հետ բերել, սակայն մենք առնվազն պետք է պահանջատեր լինենք եղածի նկատմամբ»,- «Հյուրիեթ դեյլի նյուզին» ասել է Մալաթիայի հայերի բարեգործական միության (HAYDER) ղեկավար Գարո Փայլանը:

HAYDER-ը, որն առաջինը հանրության ուշադրությունը հրավիրեց հայկական մշակութային ժառանգության վրա, ժամանակ առ ժամանակ հեռախոսազանգեր է ստանում երկրի տարբեր շրջաններում պահպանված հայկական մշակութային կոթողների վիճակի մասին:

«Մենք հետևողականորեն անդրադառնում ենք այդ հեռախոսազանգերին»,- ասում է Փայլանը` հավելելով, որ դեռևս քայլեր չեն ձեռնարկում այդ ուղղությամբ: Քննադատելով վարչապետ Ռեջեփ Թայիփ Էրդողանի և Մալաթիայի քաղաքապետարանի կեղծ սրտացավությունը Մալաթիայի քանդված մատուռի խնդրով` Փայլանը նաև ասել է, որ նրանք տեղի են տվել` վախենալով հանրային արձագանքից:

«Եթե նրանք, իրոք, անկեղծ են, ապա պետք է մեզ վերադարձնեն Մալաթիայի 300 տարվա Սուրբ Երրորդություն եկեղեցին, որը նրանք անվանում են Թաշորան, փոխարենը մշակութային կենտրոնի վերածելու»,- ասել է Փայլանը` հավելելով, որ պատրաստվում են այս խնդրի առնչությամբ առաջիկա օրերին դիմելու նաև Մալաթիայի տեղական իշխանություններին:

Մալաթիայի քաղաքապետարանի աշխատողները փետրվարի 3-ին քանդել էին այդ հին հայկական գերեզմանոցում գտնվող շինությունը, այդ թվում` «Վերջին աղոթք» մատուռը, որը օժանդակ շինություն է` հոգեհանգստյան կարգ կատարելու համար, և պահակատունը: Հանրության արձագանքից հետո Մալաթիայի քաղաքապետարանը շուտով համաձայնեց սեփական միջոցներով վերակառուցել շինությունը:

Բավական ընդարձակ գերեզմանատանն են ամփոփված նաև «Ակոս» երկլեզու թերթի խմբագրապետ Հրանտ Դինքի (սպանվել է 2007-ի հունվարի 19-ին Ստամբուլում) ընտանիքի հանգուցյալների շիրիմները: