Կրթության և գիտության փոխնախարար Արա Ավետիսյանը տեղեկացնում է, որ բարեփոխումներ են սկսվել միջին մասնագիտական կրթության ոլորտում` բարեփոխումների ծրագրում ընդգրկվել են 12 քոլեջներ, որոնք վերանորոգվել ու կահավորվել են:
«Դրանք իրականացնում են ոչ միայն միջին մասնագիտական կրթություն, այլև վերապատրաստում` աշխատաշուկայի պահանջարկի հիման վրա»,- ասաց փոխնախարարը երեքշաբթի լրագրողների հետ հանդիպման ժամանակ:
Համաձայն կրթության և գիտության նախարարության տվյալների` Հայաստանում այժմ գործում են նախնական և միջին մասնագիտական կրթություն իրականացնող 115 պետական ուսումնական, 23 ոչ պետական միջին մասնագիտական հաստատություններ:
Ընդհանրապես կրթության ոլորտում տեղի ունեցող գործընթացների արդյունքում միջին մասնագիտական սեկտորից առաջին հերթին դուրս է մղվել մանկավարժ մասնագետների պատրաստումը, քանի որ, ըստ փոխնախարարի, «մանկավարժական բարձրագույն կրթություն ապահովող բուհերը փակում են դաշտը»: Այս միտումը նկատվում է նաև «բժշկական գործ» պատրաստող միջին մասնագիտական հաստատություններում:
Ավետիսյանի խոսքով` միջին մասնագիտական կրթական հաստատություններում ընդլայնվել են ինժեներական, սպասարկման տեխնիկական մասնագիտությունները, ինչը պայմանավորված է աշխատաշուկայի պահանջարկով:
«Այս տարվանից նախնական և միջին մասնագիտական ուսումնական հաստատությունների համար ընդունելության առանձին քննություններ չեն անցկացվի: Շրջանավարտը միասնական կամ ավարտական քննություն հանձնելու դեպքում հնարավորություն կստանա նաև մասնակցելու քոլեջների ընդունելությանը»,- տեղեկացրեց Ավետիսյանը` հավելելով, որ 9-րդ դասարան ավարտած (այսինքն` ավագ դպրոց չգնացող) շրջանավարտները կարող են միջին մասնագիտական կրթություն ստանալ իրենց 9-րդ դասարանի ավարտական քննությունների հիման վրա, եթե այդ քոլեջը կամ ուսումնարանը կրթություն իրականացնում է հանրակրթական դպրոցի բազայի վրա:
«Մենք պետք է հասնենք նրան, որ աշխատաշուկայում միջին մասնագիտական որակավորման լավ մասնագետն իսկապես պահանջարկ ունենա»,- ասաց Ավետիսյանը` օրինակ բերելով, որ այդ դեպքում աշխատանքի հայտարարություններում ոչ թե երիտասարդ, բարետես աղջիկների կհրավիրեն աշխատանքի, այլ որոշակի մասնագիտություն ունեցող անձանց։
English
Հայերեն
ՎԵՐԵՎ 
Readers' comments
Post a comment
Comments are welcomed and encouraged. However, comments not pertaining to the topic or containing slander or offensive language will be deleted. You have to be registered to be able leave your comment. Sign in or Register now for free.