Նախաձեռնող խումբը «Օտարալիզության» մրցանակ է շնորհել բարձրաստիճան պետական գործիչներին` Հայաստանում օտարալեզու դպրոցների վերաբացմանը հավանություն տալու համար:
Հինգշաբթի հայտարարված մրցանակակիրների թվում են երկրի նախագահն ու վարչապետը:
Ըստ «Մենք դեմ ենք օտարալեզու դպրոցների վերաբացմանը» քաղաքացիական նախաձեռնող խմբի` «Օտարալիզության ասպարեզում Աշոտյան-Դելյանովի անվան մրցանակը» (ՀՀ ներկայիս կրթության և գիտության նախարար Արմեն Աշոտյանի և 19-րդ դարում Ռուսական կայսրության ժամանակ Հայաստանի կրթության նախարար Իվան Դելյանովի անունով) և խորհրդանշական 30 դրամի չափով դրամական պարգևը, որը Հիսուսին մատնելու համար Հուդայի վերցրած 30 արծաթի անալոգիան է, նախատեսված է «թուք ու մուր» անելու այն գործիչներին և կազմակերպություններին, որոնց գործունեությունն աղավաղում է հայոց լեզուն և հայերենով կրթությունը, որպեսզի հանրությունն ու գալիք սերունդները հիշեն նրանց:
2010-2011 թթ. Հայաստանում «Լեզվի մասին» և «Հանրակրթության մասին» օրենքներում կատարվող փոփոխությունները, ըստ որի Հայաստանում հնարավոր կլինի բացել սահմանափակ թվով օտարալեզու դպրոցներ, հասարակական լայն դժգոհության առիթ դարձան:
Օրինագծի դեմ հանդես եկան բազմաթիվ մտավորականներ, քաղաքական գործիչներ և տարբեր հասարակական կազմակերպություններ, որոնց կարծիքով նման փոփոխությունները կվտանգեն հայի ազգային ինքնությունը:
Մասնավորապես, «Մենք դեմ ենք օտարալեզու դպրոցների վերաբացմանը» նախաձեռնությունը բազմաթիվ ակցիաներ է կազմակերպել ընդդեմ այդ օրենքների փոփոխությունների ընդունման, իսկ հետո՝ նաև վավերացման:
Նրանց կարծիքով` փոփոխություններն ունեն բազմաթիվ վտանգներ, որոնցից է նաև օտարալեզու վերնախավի ստեղծումը, դրանով իսկ ազգային անկախ պետականության վտանգումը, հայոց լեզվի գործածության ոլորտի սահմանափակումը:
«Մրցանակաբաշխության նախաձեռնող խումբը, հաշվի առնելով հանրության առաջարկությունները, կազմել էր թեկնածուների ցուցակ, որը և դրվել էր համացանցում` բաց քվեարկության»,- ասում է նախաձեռնության մասնակից Արմեն Հովհաննիսյանը` հավելելով, որ բացի գլխավոր «մրցանակակիրներից», մյուս մասնակիցներն էլ «կարժանանան պատվոգրերի»:
Մրցանակն ունի երեք աստիճան՝ առաջին կարգի օտարալեզ` ոսկե մեդալ, երկրորդ կարգի օտարալեզ` արծաթե մեդալ, և երրորդ կարգի օտարալեզ` բրոնզե մեդալ:
Առաջադրված 10 թեկնածուների թվում էին ՀՀ նախագահը, վարչապետն ու մի շարք պատգամավորներ, ինչպես նաև Գյումրու քաղաքապետը, մի քանի կրթական հաստատությունների տնօրեններ և այլք:
«Մրցույթում» ձայների քվեարկությամբ առաջին տեղը զբաղեցրեց ՀՀ նախագահ Սերժ Սարգսյանը, ով 2011 թ. հունվարին ստորագրել է «Լեզվի մասին» և «Հանրակրթության մասին» օրենքների փոփոխությունները: Երկրորդ տեղը բաժին ընկավ ՀՀ վարչապետ Տիգրան Սարգսյանին, ով առաջ էր քաշել և Ազգային ժողով ուղարկել վերոհիշյալ օրենքներում փոփոխությունների օրինագիծը: Իսկ երրորդ տեղում էին այն 69 պատգամավորները, որոնք 2010 դեկտեմբերին Ազգային ժողովում երկրորդ և վերջնական ընթերցմամբ ընդունել են այդ օրենքների փոփոխությունները:
«Կարևոր չէ, թե ով որ տեղն է զբաղեցրել, բոլորն էլ հավասարաչափ պետք է խղճի խայթ զգան, սա պատժի միջոց չէ, այլ ընդամենը փաստի արձանագրում, մենք մեզ չէինք հարգի, եթե նման գործողություն չկատարեինք»,- «ԱրմենիաՆաուին» ասում է քաղաքացիական նախաձեռնության համակիր, արվեստագետ Լալա Մնեյանը:
Կավից պատրաստված և համապատասխան ոսկեգույն, արծաթե կամ բրոնզե գույնով ներկված մեդալների երեսին քանդակված են Աշոտյանի և Դելյանովի դիմապատկերները:
«Օտարալիզության» մրցանակակիրներից ոչ մեկը դեռևս չի արձագանքել:
Ավելի վաղ, սակայն, կառավարության պաշտոնյաները և իշխանամետ ներկայացուցիչները խորհրդարանում բացատրել էին, որ Հայաստանում օտարալեզու կրթության արգելքի պաշտոնական հանումը, ինչը վերաբերում է միայն սահմանափակ թվով օտարալեզու դպոցների, կարևոր դերակատարություն կունենա երկրի հանրային կրթության վրա, ինչպես նաև հնարավորություններ կստեղծի Հայաստանում աշխատող արտասահմանցի ուսուցիչներից փորձ քաղելու համար:
English
Հայերեն
ՎԵՐԵՎ 
Readers' comments
Read commented Article
Post a comment
Read all 1 comments
Comments are welcomed and encouraged. However, comments not pertaining to the topic or containing slander or offensive language will be deleted. You have to be registered to be able leave your comment. Sign in or Register now for free.