Գեղարքունիքի մարզի բնակիչները, փակելով Երևան-Սևան մայրուղու Երևան-Մարտունի ճանապարհահատվածը, հույս ունեն վերջնականապես կասեցնել Արգիճի գետի Գայլաձոր վտակի վրա հէկի կառուցումը:
Հուլիսի 19-ին` առավոտյան, ավելի քան 500 բնակիչ փակել էին Երևան-Սևան մայրուղու Երևան-Մարտունի ճանապարհահատվածը` մոտ 5 ժամ թույլ չտալով տեղաշարժվել ավելի քան 1000 ավտոմեքենաների: Արդյունքում` ժամանել էին Գեղարքունիքի մարզպետարանի աշխատակիցներ, ովքեր խնդրել են տասն օր` խնդիրը լուծելու համար:
«Բնակիչները դիմել էին բոլոր իրավասու մարմիններին և այս պարագայում արդեն ուրիշ անելիք չունեին: Նրանք պատրաստ են կրկնել նույն քայլը, եթե 10 օրում դրական տեղաշարժ չնկատվի»,- «ԱրմենիաՆաուին» ասում է Գավառի «Օրհուս» կենտրոնի համակարգող Լիաննա Ասոյանը:
Արգիճին Սևանը սնուցող 28 գետերից ամենախոշորն է: Այն տարեկան 12 սանտիմետրով ապահովում է Սևանի ջրի մակարդակի բարձրացումը և շրջակա վեց գյուղերի շուրջ 30000 բնակիչների կողմից օգտագործվում ոռոգման նպատակով: Այժմ Արգիճին սնուցող Գայլաձոր վտակի հունը փոխելու ծրագիրն իրականացնելու դեպքում ջրերի մի մասը կուղղվի դեպի Վայոց ձոր, որը Սևանի հակառակ կողմում է:
Ասոյանի տեղեկացմամբ` «Զանգեզուր էքսպո» ՍՊԸ-ն Արգիճի գետի վրա անօրինական կերպով կառուցում է փոքր հէկ, քանի որ այն իրավունք ունի շինարարություն իրականացնել միայն Եղեգիս գետի Կապույտ Բերտ վտակի վրա:
Բնապահպանները համոզված են, որ գետի հունի փոփոխությամբ կիջնի երկրի քաղցրահամ ջրերի ամենամեծ ավազանի` Սևանա լճի մակարդակը, որի ջրի բարձրացումը վերջին տարիներին ազդել է լճափի երկայնքով գործող մի քանի եկամտաբեր բիզնեսների վրա: Բացի այդ, վերջերս արձանագրված ջրի մակարդակի այսչափ բարձրացումը համարվում է ամենակարևոր բնապահպանական խնդիրը մեր երկրի համար, որտեղ Սևանա լիճը ողջ էկոհամակարգի գլխավոր տարրն է:
Հէկի կառուցմամբ խախտվում է «Սևանի մասին» ՀՀ օրենքը, որի համաձայն` արգելվում է Սևանի ավազանի ջրային պաշարներն օգտագործել այլ նպատակներով` հէկի կառուցում, ոռոգում թե այլ: Բացի այդ, դա վտանգավոր է ձկների, մասնավորապես` իշխանի համար, քանի որ նրանք ձվադրում են հենց այդ գետի ակունքում:
English
Հայերեն
ՎԵՐԵՎ 
Readers' comments
Post a comment
Comments are welcomed and encouraged. However, comments not pertaining to the topic or containing slander or offensive language will be deleted. You have to be registered to be able leave your comment. Sign in or Register now for free.