Հայաստանում վտանգված ջրվեժի պահպանման համար երկարատև պայքարը կարծես իր առաջին պտուղներն է տվել այս շաբաթ. երկրի գործադիրը որոշել է Թռչկանի ջրվեժին տալ այնպիսի կարգավիճակ, որը զերծ կպահի նրան արդյունաբերական նպատակով ցանկացած շահագործելուց:

«Պահպանենք Թռչկանի ջրվեժը» քաղաքացիական նախաձեռնության անցկացրած մի շարք բողոքի ակցիաներին ի պատասխան` հինգշաբթի վարչապետն առաջարկել է ընդունել որոշում և Թռչկանի ջրվեժին տալ հատուկ պահպանվող տարածքի կարգավիճակ:

Հայաստանի հյուսիսային Շիրակի ու Լոռու մարզերի սահմանին գտնվող Թռչկանի ջրվեժը Հայաստանի ամենաբարձր (25,5 մետր) և ամենաջրառատ ջրվեժն է:

2008-ին Թռչկանը ճանաչվել է բնության ջրագրական հուշարձան: Սակայն դա արգելք չեղավ, որպեսզի ջրվեժի տարածքում` Չիչխան գետի հունի վրա, «Ռոբշին» ՍՊԸ-ն փոքր հիդրոէլեկտրակայան կառուցելու թույլտվություն ստանա: Մի խումբ բնապահպանական հասարակական կազմակերպություններ և անհատներ մտավախություն էին հայտնել, որ հէկի կառուցումն աղետալի կլիներ ջրվեժի գոյության համար:

Թեև բնապահպանության նախարարն ասել էր, որ հէկը կշահագործվի գարնան վարար ամիսներին, իսկ ամռանը սեփականատերը ձեռք չի տա ջրվեժին, սակայն բնապահպանները չէին դադարում բողոքելուց:

«Պահպանենք Թռչկանի ջրվեժը» քաղաքացիական նախաձեռնության 12 անդամները հոկտեմբերի 25-ից ջրվեժի մոտ վրաններ էին տեղադրել և բողոքի անժամկետ նստացույց սկսել: Իսկ երբ «Ռոբշին» ՍՊԸ-ը հայտարարեց, որ բնապահպանության նախարարության առաջարկով կասեցրել է շինարարական աշխատանքները և շինհրապարակից դուրս է բերում տեխնիկան, քաղաքացիական նախաձեռնության մասնակից մի շարք ՀԿ-ներ այդ քայլը որակեցին շեղող միջոց և շարունակեցին բողոքի նստացույցը` պահանջելով վերջնական որոշում ընդունել:

Նոյեմբերի 3-ին տեղի ունեցած կառավարության հերթական նիստի ընթացքում վարչապետ Սարգսյանը, անդրադառնալով Թռչկանի ջրվեժի խնդրին, հանձնարարականներ տվեց փոխվարչապետ Արմեն Գևորգյանին, որպեսզի բոլոր համաձայնություններն ի կատար ածվեն տեղական ինքնակառավարման մարմինների կողմից, ըստ որի` ջրվեժի տարածքը կօգտվի հատուկ պահպանվող տարածքի ռեժիմից:

Բնապահպանության նախարար Արամ Հարությունյանն էլ լրագրողների հետ ճեպազրույցում հայտնեց, որ ջրվեժի մերձակա տարածքի հողերի կատեգորիան կփոխվի և արդյունաբերական նշանակությունից կվերածվի բնության հատուկ պահպանվող տարածքի: Նախարարը չբացառեց նաև, որ կքննարկվի «Ռոբշին» ընկերությանը փոխհատուցում տրամադրելու հարցը: Մասնավոր ընկերությունը դեռևս ոչ մի կերպ չի արձագանքել:

«Պահպանենք Թռչկանի ջրվեժը» նախաձեռնության անդամ, բնապահպանական փորձագետ Արմեն Վերմիշյանը «ԱրմենիաՆաուի» հետ զրույցում գործադիրի այս քայլը որակեց որպես «Թռչկանի փրկություն»:

«Սա մեր պայքարի արդյունքն էր, այսպիսով Թռչկանը փրկվեց, այժմ պետք է այն պահպանել և զարգացնել»,- ասում է փորձագետը:

Սակայն «Էկոլուր» ՀԿ ղեկավար Ինգա Զարաֆյանը չի շտապում ուրախանալ և բավարարվել կառավարության այս քայլով:

Ըստ բնապահպանի` բնապահպանության նախարարությունը խախտել է օրենքը, երբ դրական բնապահպանական փորձաքննության եզրակացություն է տվել հէկի կառուցման համար ջրվեժի տարածքում:

«Այն, որ կարգը փոխվում է, դա լավ է, բայց մենք պահանջում ենք, որ անվավեր ճանաչվեն «Ռոբշին» ընկերությանը տրված ջրօգտագործման թույլտվությունը և բնապահպանական փորձաքննությունը, որը հետագայում էլ կապահովի Թռչկանի պահպանումը»,- «ԱրմենիաՆաուին» ասում է Զարաֆյանը: