Համացանցում հայտնվել է տեսանյութ, որտեղ Սյունիքի մարզպետ Սուրիկ Խաչատրյանը բնպահպան ակտիվիստ Մարիամ Սուխուդյանին «ճպուռ» է անվանում:

Միջադեպը տեղի է ունեցել այս շաբաթվա սկզբին, երբ բնապահպաններն այցելել էին Քաջարան գյուղ` տեղեկություններ հավաքելու Քաջարան, Արծվանիկ, Սևաքար, Աճանան, Չափնի ու Սյունիք համայնքների ենթակայության տակ գտնվող տարածքների մասին, որոնք, կառավարության որոշմամբ, տրամադրվելու են «Զանգեզուրի պղնձամոլիբդենային կոմբինատ» ՓԲԸ-ին:

Տեսանյութը ուշադրության է արժանացել մեծ մասամբ այն պատճառով, որ սա արդեն երկրորդ դեպքն է, երբ պաշտոնյան բախվում է կնոջ հետ: Դեռևս անցյալ ամիս Խաչատրյանն ապտակել էր մի գործարար կնոջ: Թեև միջադեպը ֆիքսել էր հյուրանոցի տեսախցիկը, սակայն մարզպետի դեմ վարույթ չհարուցվեց:
Սուխուդյանը նշում է, որ Սյունիքի մարզպետի հետ հանդիպումը «շոուի» էր վերածվել:

«Գյուղացիները զարմացած էին. մարզպետը երբեք չէր այցելել նրանց: Նա իրեն շատ բռի էր պահում, սպառնում էր: Տոնավաճառային խոսակցություն էր»,- ասում է նա` նկարագրելով մարզպետի հանդիպումը գյուղացիների հետ:

Սյունիքի մարզպետարանի տեղեկատվության և հասարակայնության հետ կապերի բաժնի պետ Աշոտ Քարամյանը «ԱրմենիաՆաուի» հետ հեռախոսազրույցում ասաց, որ մարզպետ Սուրիկ Խաչատրյանը տվել է իր պատասխանն այդ տեսանյութի առնչությամբ, և անջատեց հեռախոսը, որից հետո դադարեց պատասխանել հեռախոսազանգերին:

Լրատվամիջոցներին տված հարցազրույցներում Խաչատրյանը ասել է, որ «ճպուռ» բառում վատ բան չի տեսնում:

«Ճպուռ է՝ ճպուռ ասեցի, ի՞նչ կա դրա մեջ, վիրավորական ի՞նչ կա, չեմ հասկանում, ճպուռը քաղցր խոսք ա, վիրավորականի բան չկա,- ասել է մարզպետը և հերքել, որ հանդիպման ժամանակ լարվածություն է եղել: - Ասում էր` տարածքի էկոլոգիան վատ ա, էս ա, էն ա, ես էլ ասեցի` նայի` քեզ վատ բան չլինի։ Միտինգ էր անում, ես էլ ասեցի՝ նայի՝ քեզ բան չլինի։ Ամոթ իրենց, եթե կասեն, թե սպառնացել եմ։ Մենք ջան-ջիգյարով ենք իրարից հեռացել, ես իրանց ցտեսություն եմ արել և ասել, որ եթե խնդիր կունենաք` կդիմեք ինձ»։