Հանրապետության գլխավոր ինֆեկցիոնիստ Արա Ասոյանը շաբաթ օրը Հանրային հեռուստատեսությամբ կոչ արեց Հայաստանում սեզոնային գրիպի տարածումը կանխելու նպատակով փակել դպրոցները, մանկապարտեզներն ու բուհերը:

Ասոյանի կոչը անհանգստություն և անգամ խուճապ է առաջացրել հասարակության շրջանում, և առողջապահության պաշտոնյաներին այսօր (դեկտեմբերի 7-ին) հանդիպելու և իրավիճակը քննարկելու առիթ դարձել: Ենթադրվում է, որ երկուշաբթի կամ երեքշաբթի որոշում կընդունվի` արդյոք անհրաժե՞շտ է փակել դպրոցները:

«Ներկա պահին քաղաքապետարանի ու առողջապահության նախարարության համագործակցությամբ հավաքվում են դպրոցներում հաճախելիության ցուցանիշները, դրանցից էլ կախված է, թե ինչ որոշում կընդունվի»,- «ԱրմենիաՆաուին» ասում է առողջապահության նախարարի օգնական Շուշան Հունանյանը: Ըստ նրա` եթե որոշումը դրական լինի, դպրոցներն ու մանկապարտեզները «ամենայն հավանականությամբ, կփակվեն հաջորդ շաբաթից»:

Մայրաքաղաքի շատ դպրոցներում աշակերտների հաճախելիությունը կտրուկ նվազել է: Հիգիենիկ և հակահամաճարակային պետական տեսչության ստուգումների համաձայն`300-500 աշակերտ ունեցող դպրոցներում ամեն օր բացակայում է ավելի քան 100 աշակերտ:

Մայրաքաղաքի մի քանի դպրոցների տնօրեններ «ԱրմենիաՆաուի» հետ զրույցում ասացին, որ կիսամյակի վերջում դպրոցներ փակելը իրենց համար հավելյալ խնդիրներ է ստեղծելու` գնահատականները որոշելու հարցում, այդուամենայնիվ.

«Հիվանդության հետ պետք չէ վիճել. եթե վարակն իսկապես տարածվում է, ուրեմն այն պետք է կանխել»,- ասաց Երևանի Պարույր Սևակի անվան 123-րդ դպրոցի տնօրեն Լարիսա Բաղդյանը:

Առողջապահության նախարարությունը միջոցներ է ձեռնարկում գրիպի վարակի տարածումը կանխելու ուղղությամբ, որը գրեթե յուրաքանչյուր ընտանիքի անհանգստության պատճառն է, և հանրապետությունում առնվազն 3 մահացության դեպք է գրանցվել:

Ասոյանի կոչը զուգադիպեց Հայաստանում արձանագրված խոզի գրիպի նոր դեպքերի մասին տեղեկատվության հետ, քանի որ անցյալ հանգստյան օրերին H1N1 գրիպով վարակվածների թիվը երկրում ավելացել է` 7-ից հասնելով 35-ի: (Խոզի գրիպը ոչ մի ակներև կապ չունի սովորական գրիպի հետ:)