Հայաստանում խոզի գրիպի և սեզոնային գրիպի սպառնալիքը ստիպում է մարդկանց դիմել կանխարգելիչ տնական միջոցների` գնելով ավելի շատ սխտոր: Այս իրավիճակից շտապում են օգտվել վաճառողները` արագ փոխելով գնապիտակները:

Համարվում է, որ սխտորը ունի մանրէասպան և նույնիսկ թերապևտիկ ազդեցություն, երբ օգտագործվում է գրիպի կամ սովորական մրսածության ախտանշանների ժամանակ: Սխտորը շատ առևտրականների համար այժմ դարձել է լավ վաճառվող ապրանք:

Անցյալ տարվա համեմատությամբ սխտորի գինը գրեթե կրկնապատկվել է: Այժմ շուկայում տեղական սխտորը վաճառվում է 1800-2000 (մոտ 5 դոլար) դրամով: Վաճառողներն ասում են, որ անցյալ տարի սխտորը վաճառել են 800-1000 (2-2,6 դոլար) դրամով:

Հարևան Իրանից ներմուծված սխտորը վաճառվում է 1000-1500 (2,60-3,80 դոլար) դրամով: Մասնագետները բացատրում են, որ ներմուծվածի համեմատությամբ տեղական սխտորն ունի կանխարգելիչ բարձր հատկություններ:

Գրիպը կանխարգելելու նպատակով բժիշկները նաև խորհուրդ են տալիս օգտագործել սխտոր, որն ունի մանրէասպան, կանխարգելիչ և բուժիչ հատկություններ: Սխտորի բուժիչ հատկություններն ավելի արդյունավետ են, եթե այն օգտագործվում է հում վիճակում:

Համաձայն արտասահմանյան լրատվամիջոցների հաղորդումների` խոզի գրիպի կանխարգելման նպատակով Ռուսաստանի և Չինաստանի շատ դպրոցներում երեխաները գցում են սխտորից պատրաստված «մանյակ» և ուտում են այն դպրոցում վաճառվող սննդամթերքի հետ:

Չնայած սխտորի տհաճ հոտին` սխտորից «մանյակ» կրելու պրակտիկան կիրառվում է նաև շատ հայերի տներում:

«Մերգելյան ինստիտուտի» հարևանությամբ գտնվող շուկայի վաճառողուհի Գայանե Մելիքսեթյանն ասում է, որ սխտորի պահանջարկը, չնայած անսովոր բարձր գնին, բավական մեծ է:

«Երեկ, օրինակ` 20 կիլո ունեի, ամբողջը ծախվեց, հիմա նորից եմ գնել, որ վերավաճառեմ»,- ասում է Մելիքսեթյանը:

ՀՀ գյուղատնտեսության նախարարության բուսաբուծության, անտառային տնտեսության և բույսերի պաշտպանության վարչության պետ Գագիկ Մանուչարյանը «ԱրմենիաՆաուին» ասաց, որ սխտորի թանկացմանը նախևառաջ նպաստել է խոզի գրիպի ներթափանցումը Հայաստան:

«Բոլորս էլ գիտենք, որ եթե շուկայում մի ապրանքը լավ է վաճառվում, վաճառողներն անմիջապես այն թանկացնում են»,- ասաց Մանուչարյանը: