Հայաստանի գլխավոր ինֆեկցիոնիստը չի բացառում, որ սեզոնային գրիպի դեպքերի ավելացման պատճառով հանրապետության բուհերը կարող են փակվել ձմեռային արձակուրդից ավելի շուտ:

Այս շաբաթասկզբին «Նորք» ինֆեկցիոն հիվանդանոցի տնօրեն Արա Ասոյանի առաջարկով և ՀՀ կրթության և գիտության նախարարի հրամանով հանրապետության դպրոցներն ու մանկապարտեզները փակվեցին մինչև դեկտեմբերի 21-ը:

Նախկինում բուհերը կարող էին փակվել-չփակվելու հարցն ինքնուրույն որոշել: Իսկ այժմ քննարկվում է, որ բուհերը կարող են փակվելու հրաման ստանալ արդեն դեկտեմբերի 13-ից: Ըստ Ասոյանի` ՀՀ առողջապահության նախարարությունը մինչ օրս չի փակել բուհերը, քանի որ, ի տարբերություն դպրոցականների, ուսանողները «հասուն մարդիկ են և հասկանում են, թե ինչ է հիվանդության կանխարգելումը»: (Տե´ս «Խտրական վերաբերմո՞ւնք. բուհերի ուսանողներն ասում են, որ իրենց նույնպես պետք է ազատեն դասերից գրիպի պատճառով» հոդվածը:)

Բուհերում այժմ նախաքննական շրջան է, ուստի ուսումնական գործընթացն ընդհատելը ցանկալի չէ: Սակայն, եթե փակվելու որոշում ընդունվի, ապա դա կազդի Հայաստանի 23 պետական բուհերի առնվազն 81 000 ուսանողների վրա: Եթե համալսարանները փակվեն, ուսանողներն իրենց կիսամյակային ստուգարքները կհանձնեն ոչ թե ձմեռային արձակուրդից առաջ, այլ ամանորից հետո` քննությունների հետ:

Հինգշաբթի օրը տեղի ունեցած մամուլի ասուլիսի ժամանակ Ասոյանը նաև հաստատեց, որ դեկտեմբերի 10-ի տվյալներով Հայաստանում արձանագրվել է A/H1N1 խոզի գրիպով վարակվածների 54 դեպք, որից 26-ը երեխաներ են: Ըստ ՀՀ առողջապահության նախարարության` դեկտեմբերի տվյալներով` Հայաստանում գրանցվել է սեզոնային գրիպով վարակվածների 31 467 դեպք: