Չորեքշաբթի նախագահի մրցանակների արժանացան Հայաստանի մի շարք քաղաքային և գյուղական համայնքներ, որոնք 2009 թ. առավել ակտիվ մասնակցել էին զանգվածային մարզական միջոցառումների: «Լավագույն մարզական քաղաքային համայնք», «Լավագույն բակ» և «Լավագույն գյուղական համայնք» անվանակարգերում մրցանակները շնորհվեցին սպորտի և երիտասարդության հարցերի նախարարությունում:

«Լավագույն մարզական քաղաքային համայնք» անվանակարգում 1,5 մլն դրամ (4000 դոլար) առաջին մրցանակը շնորհվեց ՀՀ Կոտայքի մարզի Աբովյան քաղաքին (յուրաքանչյուր անվանակարգում շնորհվել է երեք մրցանակ): Արագածոտնի մարզի Արագած գյուղն արժանացավ «Լավագույն գյուղական համայնք» անվանակարգում 1 մլն դրամ (2 666 դոլար) առաջին մրցանակին:

2009 թ. «Լավագույն մարզական բակ» անվանակարգում 1 մլն դրամ առաջին մրցանակին արժանացավ Երևանի Շենգավիթ համայնքի բակերից մեկը: Այս անվանակարգում երկրորդ մրցանակը (1 մլն դրամ) շնորհվեց Կոտայքի մարզի Չարենցավան քաղաքի բակերից մեկին, իսկ երրորդ մրցանակը (500 000 դրամ)`Լոռու մարզի Վանաձոր քաղաքի Տարոն համայնքի մի բակի:

2009 թ. ամենամարզական քաղաքներ ճանաչվեցին Կապան (Սյունիքի մարզ), Էջմիածին (Արմավիրի մարզ) և Իջևան (Տավուշի մարզ) քաղաքները, որոնց քաղաքապետներին սպորտի և երիտասարդության հարցերի նախարարությունը շնորհակալագրեր շնորհեց: