Հինգշաբթի Երևանում Եվրագավաթի որակավորման վերջին` վեցերորդ տուրում F խմբում ընդգրկված Հայաստանի կանանց բասկետբոլի ակումբը` «Հատիսը», 78:74 հաշվով հաղթանակ տարավ Թուրքիայի «Բեշիկթաշի» նկատմամբ: Հաղթանակը Հայաստանի թիմին ապահովեց երկրորդ տեղը (9 միավորով) և անցումը փլեյ-օֆ: «Բեշիկթաշը» նույնպես ունի 9 միավոր, սակայն վաստակած և բաց թողած միավորների հարաբերակցությամբ և «Հատիսից» կրած երկու պարտության (սեփական հարկի տակ և արտագնա խաղերում) պատճառով Ստամբուլի թիմը երրորդ տեղում է: Խմբի վերին հորիզոնականը զբաղեցնում է «Սոնի Աթինաիկոսը» (Աթենք, Հունաստան):

Հինգշաբթի օրվա խաղն անցավ մարզասերներով լի «Միկա» մարզադահլիճում: «Բեշիկթաշի» հետ հանդիպման ընթացքում «Հատիսը» նախաձեռնությունն իր ձեռքը վերցրեց և այդ ոգով շարունակեց մինչև խաղավարտը: Խաղավարտին Ստամբուլի թիմին հաջողվեց կրճատել հաշիվը, սակայն հավասարեցնել` չհաջողվեց:

Թիմի ավագ սերբիացի Բոյանա Վուլիչն իր հաշվին գրանցեց 23, իսկ ճամայկացի Մաուրիտա Ռեյդը` 22 միավոր` ապահովելով «Հատիսի» հաղթանակը: «Հատիսի» կազմում Ռեյդը, վեց խաղում վաստակելով 119 միավոր, մրցաշարի ռմբարկուների շարքում 10-րդն է դասվել:

Մամուլի ասուլիսի ընթացքում «Հատիսի» գլխավոր մարզիչ Գիա Ղազանչյանը նշեց, որ այս հաղթանակն ամբողջ Հայաստանի հաղթանակն է: «Ուզում եմ առանձնահատուկ նշել մարզադահլիճի աջակցությունը։ Սա ուղղակի անհավանական էր։ Մենք ունեինք լրացուցիչ խաղացող. ամբողջ խաղն անցկացրինք վեցը հինգի դեմ»,- ասաց Ղազանչյանը:

Խաղավարտից հետո «Հատիսի» խաղացողները իրենց առանձնահատուկ երախտագիտությունը հայտնեցին խանդավառ մարզասերներին` նրանց հղելով օդային համբույրներ:

«Բեշիկթաշի» գլխավոր մարզիչ Ազիզ Աքայան շնորհակալություն հայտնեց Երևանում հայկական կողմի ջերմ ընդունելության համար:

«Նախորդ տարի մենք ելույթ էինք ունենում Եվրոլիգայում, սակայն այնտեղ ևս լեփ-լեցուն տրիբունաներ ոչ միշտ կարելի է տեսնել: Իսկ այսօր Հայաստանում շատ լավ մթնոլորտում անցավ խաղը: Մարզասերների աջակցությունը բավական օգնեց «Հատիսին»: Հայաստանում առաջին անգամ էինք, և կարող եմ ասել, որ ամեն ինչ լավ էր կազմակերպված: «Հատիսը» լավ թիմ է և հետագայում կարող է լավ արդյունքների հասնել, սակայն Եվրոպայում ուժեղ թիմեր շատ կան, և նրանց հետ մրցելն առավել դժվար կլինի»,- նշեց թուրքական թիմի մարզիչը:

Երևանի թիմի հաջորդ մրցակիցը կանանց բասկետբոլի Եվրագավաթի 1/16 եզրափակիչում կլինի Օրենբուրգի «Նադեժդան»։

1/16 եզրափակիչում Հայաստանի և Ռուսաստանի թիմերի միջև առաջին հանդիպումը կանցկանցվի Երևանում հունվարի 7-ին: