Այսօր Հայաստանում մեկնարկեց բասկետբոլի Եվրոպայի առաջնության կանանց C դիվիզիոնի մրցաշարը` հյուրընկալելով Անդորրայի, Ջիբրալթարի, Ուելսի, Շոտլանդիայի, Մոլդովայի թիմերին, որոնք ՖԻԲԱ-ի երեք դիվիզիոններից ամենացածր վարկանիշ ունեցողներն են: Մրցաշարին մասնակցող Հայաստանի հավաքականը հույս ունի բարելավել իր դիրքերը և հայտնվել B դիվիզիոնի կազմում:

Հայաստանի առաջատար բասկետբոլի ակումբ «Հատիսը» 2009-2010 թթ. հասնելով փլեյ օֆ փուլ` հեղինակություն ձեռք բերեց և դա էլ նպաստեց, որ երկու տարին մեկ անգամ անցկացվող Եվրոպայի առաջնությունը, որը կտևի մինչև հուլիսի 3-ը, այս անգամ հյուրընկալի Հայաստանը:

«Ես ընդամենը մեկ օր եմ այստեղ, բայց արդեն հասկացել եմ, որ Հայաստանը մեծ ոգևորությամբ է պատրաստվել այս խաղերին, ու հրավիրված երկրների ներկայացուցիչները ևս մեծ գոհունակությամբ կվերադառնան իրենց երկրներ»,- ասում է ՖԻԲԱ-Եվրոպայի (41 անդամ ունեցող և մրցաշարի պատասխանատու) փոխնախագահ Ջոն Գոնսալեսը:

Մրցաշարին նախապատրաստվելիս հաշվի է առնվել նաև ժամանակացույցը, որպեսզի բասկետբոլի խաղերի հեռարձակման ժամերը չհամընկնեն ֆուտբոլի աշխարհի առաջնության ժամերի հետ, որին հետևում է գրեթե յուրաքանչյուր հայ երկրպագու:
Հայաստանի հանրային հեռուստատեսությունը` Հ1-ը (որը հեռարձակում է ֆուտբոլի աշխարհի խաղերը), ուղիղ հեռարձակելու է նաև բասկետբոլի մրցաշարը:

«Ֆուտբոլի ժամանակ մարդիկ երկրպագում են միայն արտասահմանյան ճանաչված թիմերին, իսկ այս խաղերը հնարավորություն կտան, որ հայ երկրպագուները հայկական դրոշին ու հայկական թիմին երկրպագեն»,- ասում է Հայաստանի բասկետբոլի ֆեդերացիայի նախագահ Հրաչյա Ռոստոմյանը:

Երևանի 1000 տեղանոց «Միկա» մարզադահլիճում ընթացող խաղերի մուտքն ազատ է: