Դեթրոյտ. Կիրակի առավոտյան պրոֆեսիոնալ բռնցքամարտի «Սուպերվեցնյակ» մրցաշարի երկրորդ փուլում Անդրե Դիրելը հաղթանակ տարավ Արթուր Աբրահամի նկատմամբ. 11-րդ ռաունդի 1:13 րոպեում հայազգի բռնցքամարտիկը որակազրկվեց:

Դիրելը (19 հաղթանակ, 1 պարտություն) սայթաքեց, և, երբ նա դեռ նստած դիրքում էր, Աբրահամը աջ ձեռքով շեղ հարվածեց նրա ծնոտին, և Դիրելը չկարողացավ շարունակել մրցամարտը:

Այս մրցամարտում Դիրելը կարծես վստահ հաղթանակ տարավ: Սա Աբրահամի առաջին պարտությունն էր իր կարիերայի ընթացքում անցկացրած 31 մրցամարտերի մեջ:

«Ջոու Լուիս» մարզասրահում երկու բռնցքամարտիկներին աջակցող բազմաթիվ մարզասերներ կային: Հայազգի Աբրահամին աջակցելու էին եկել Դեթրոյտից մեծ թվով ամերիկահայեր, որոնք մեծ դրոշ էին ծածանում:

Դիրելը ճարպկորեն տեղաշարժվելու և հարվածների արագությամբ գերիշխում էր ամբողջ մրցամարտում` ծանր հարվածներ հասցնելով Աբրահամի գլխին և իրանին:

Դիրելն աջ ձեռքի հարվածով նոկդաունի ենթարկեց Աբրահամին, երբ չորրորդ ռաունդի ավարտին մնացել էր 30 վայրկյան: Աբրահամը ոտքի կանգնեց և մինչև ութը հաշվելը պատրաստ էր շարունակելու մրցամարտը: Մինչև ռաունդի ավարտը Դիրելին հաջողվեց ևս մի քանի հարված հասցնել հակառակորդին:

Յոթերորդ ռաունդում Դիրելի հարվածից Աբրահամի աջ հոնքը պատռվեց:

10-րդ ռաունդում Աբրահամն աջ ձեռքի դիմահար հարվածով կարծես նոկդաունի ենթարկեց Դիրելին, սակայն մրցավարը դա սայթաքում համարեց:

8-րդ ռաունդում Աբրահամն անցավ գրոհի, սակայն Դիրելին հաջողվում էր խուսափել հակագրոհի անցած մրցակցի ծանր հարվածներից: Ռաունդի ընթացքում մի պահ Դիրելը սկսեց խորամանկ մարտավարություն կիրառել` մրցակցին ցույց տալով, թե հայտնվել է ծուղակում: Նա խույս էր տալիս մրցակցի ամենավտանգավոր հարվածներից և շարունակում նյարդայնացնել Աբրահամին:

Դիրելը նախաձեռնությունը կրկին իր ձեռքը վերցրեց 9-րդ ռաունդում, որի ընթացքում խաղը մի քանի րոպեով դադարեցվեց, քանի որ մրցակցի գլխի հարվածից Աբրահամը աջ հոնքի հատվածում վնասվածք էր ստացել: