Շաբաթ գլենդելցի պրոֆեսիոնալ բռնցքամարտիկ Վանես Մարտիրոսյանը ավելացրեց իր հաղթանակների թիվը` հասցնելով դրանք 28-ի: Անպարտելի բռնցքամարտիկն անցկացրած մրցելույթներից 17-ն ավարտել է նոկաուտով: Հայազգի բռնցքամարտիկն այս անգամ պարտության մատնեց Ջո Գրինին (22 հաղթանակ` 14-ը նոկաուտով, 1 պարտություն), որը մինչև Մարտիրոսյանի հետ ոչ վարկանիշային այս մրցամարտը նույնպես անպարտելի էր: Սա հայազգի բռնցքամարտիկի առաջին մրցելույթն էր, որը ցուցադրվեց HBO հեռուստատեսությամբ:

«Մղձավանջ» մականվամբ 24-ամյա հայազգի բռնցքամարտիկը, որն արմատներով Աբովյան քաղաքից է, «Չար» մականվամբ Գրինի հետ 10 ռաունդանոց մրցամարտն անցկացրեց Նյու Յորքի «Յանկի» մարզասրահում: Մարտիրոսյանին հաջողվեց պաշտպանել երկրորդ կիսամիջին քաշային կարգում NABF/NABO (Հյուսիսամերիկյան բռնցքամարտի ֆեդերացիա/Հյուսիսամերիկյան բռնցաքամարտի կազմակերպություն) վարկածներով չեմպիոնի իր գոտիները: Մրցավարները միաձայն
(96:93, 96:93 և 98:91) հաղթանակը շնորհեցին Մարտիրոսյանին:

Մարտիրոսյանների ընտանիքը Գլենդեն (Կալիֆոռնիա) է տեղափոխվել, երբ ապագա բռնցքամարտիկը դեռ 4 տարեկան էր: Յոթ տարեկանում նրա հայրը, որը սիրողական բռնցքամարտով էր զբաղվել, Մարտիրոսյանին տալիս է բռնցքամարտի: Հայազգի բռնցքամարտիկը սիրողական բռնցքամարտում հաջող մարզական կարիերա է ունեցել, այդ թվում` 2004 թ. Աթենքի օլիմպիական խաղերում երկրորդ կիսամիջին քաշային կարգում ներկայացրել է ԱՄՆ-ը: Մարտիրոսյանը սիրողական բռնցքամարտիկի իր կարիերան ավարտել է 20 տարեկանում` իր հաշվին գրանցելով 120 հաղթանակ և 10 պարտություն:

«Մղձավանջը», որի հասակը 183 սմ է, քաշը` 68 կգ, պրոֆեսիոնալ բռնցքամարտով սկսել է զբաղվել 2006 թվականից:

Մարտիրոսյանի մարզական կարիերայի մասին մանրամասն կարող եք տեղեկանալ www.vanesboxing.com կայքում: