Շաբաթ երեկոյան Երևանում IBO վարկածով գերթեթև քաշային կարգում աշխարհի չեմպիոն Վիկ Դարչինյանը (37 հաղթանակ, որից 27-ը` նոկաուտով, 3 պարտություն) դիտարժան մենամարտ անցկացրեց իր հայրենակիցների ներկայությամբ և մրցավարների միաձայն որոշմամբ հաղթեց չեմպիոնի հավակնորդ հարավաֆրիկացի Էվանս Մբամբային (18 հաղթանակ, որից 9-ը` նոկաուտով, 2 պարտություն)` պահպանելով չեմպիոնի կոչումը:

«Հայաստանն ընդդեմ աշխարհի» միջազգային մրցաշարի շրջանակներում Հայաստանում առաջին անգամ անցկացված պրոֆեսիոնալ բռնցքամարտն ավարտվեց 4:0 հօգուտ հյուրընկալող երկրի:

«Կարեն Դեմիրճյան» մարզահամերգային համալիրում հազարավոր մարզասերների, այդ թվում` ՀՀ նախագահ Սերժ Սարգսյանի, Հայաստանի ազգային օլիմպիական կոմիտեի նախագահ Գագիկ Ծառուկյանի և այլ հեղինակավոր հյուրերի ներկայությամբ 35-ամյա «Կատաղի ցուլ» մականվամբ բռնցքամարտիկը բոլոր 12 ռաունդներում առավելության հասավ իր պակաս փորձառու մրցակցի` 29-ամյա Մբամբայի նկատմամբ:

Վանաձորցի բռնցքամարտիկն ավելի վաղ հայտարարել էր, որ ցանկանում է մենամարտի հենց սկզբում նոկաուտի ենթարկել մրցակցին: Նա մինչև մրցամարտի ավարտը շարունակ հարվածներ էր տեղում Մբամբայի վրա, որի արդյունքում բոլոր երեք մրցավարներն էլ հաղթանակը (119:107, 120:107, 120:107) շնորհեցին հայազգի բռնցքամարտիկին:

Մրցելույթից հետո համալիրում հավաքված մարզասերների հետ խոսելով` Դարչինյանն ասաց, որ իր վերջին հաղթանակը նվիրում է Հայաստանի անկախության 20-ամյակին, որը պետք է նշվի սեպտեմբերի 21-ին: Նա իր գոտին նվիրեց նախագահ Սարգսյանին:

«Պատրաստվում էի ծանր նոկաուտի ենթարկել մրցակցիս…, սակայն մի քիչ շտապում էի»,- ասաց չեմպիոնը հարցազրույցի ժամանակ` հասկացնելով, որ դեռ վաղ է պրոֆեսիոնալ բռնցքամարտիկի իր կարիերան ավարտելու մասին մտածելը:

Ավելի վաղ Հայաստանը ներկայացնող Դարչինյանի թիմակիցներ Ազատ Հովհաննիսյանը (Հայաստան, 55,5 կգ), Հովհաննես Ժամկոչյանը (60 կգ) և Գաբրիել Տոլմաջյանը (59 կգ) 6 ռաունդանոց մրցամարտերում հաղթեցին համապատասխանաբար Սերգեյ Թասիմովին (Էստոնիա), Միխայիլ Գոգոլաշվիլիին (Վրաստան) և Եվգենի Ֆեոդորովին (Լատվիա): Հովհաննիսյանն ու Ժամկոչյանն իրենց մրցելույթներն ավարտեցին նոկաուտներով, իսկ Տոլմաջյանը` միավորների առավելությամբ: