Ադրբեջանի մայրաքաղաք Բաքվում անցկացվող բռնցքամարտի աշխարհի առաջնությունում հայ բռնցքամարտիկները, որոնք առայժմ անհաջող մրցելույթներ են ունենում, ինչպես հաղորդվում է, ստիպված են մարտը վարել արտակարգ պայմաններում:

Հայաստանի հավաքականի ութ ներկայացուցիչների մեծ մասը պարտվել է առաջին իսկ մրցելույթներում, իսկ նրանցից մեկն ընդհանրապես ռինգ դուրս չի եկել վնասվածքի պատճառով:

Մինչ այսօր միայն Հրաչիկ Ջավախյանն (64 կգ) ու Անդրանիկ Հակոբյանն (75 կգ) են հաղթանակ տոնել իրենց առաջին մրցելույթներում: Ավելի ուշ` երկրորդ մրցափուլում, Ջավախյանը պարտություն է կրել:

Բաքվում Հայաստանի պատվիրակությանը (13 հոգի) և Ռուսաստանի թիմին, որի կազմում ծագումով հայ երկու բռնցքամարտիկներ կան, անվտանգության նկատառումներով առանձին են տեղավորել:

Լրատվամիջոցների հաղորդմամբ, սակայն, հայ բռնցքամարտիկների մրցելույթները Բաքվի Հեյդար Ալիևի անվան մարզահամերգային համալիրի ռինգում լարված են անցել. տրիբունաներից աննախադեպ ճնշումներ են գործադրել հայ մարզիկների վրա, քանի որ մարզասերները սուլել և հայհոյել են Երևանից հյուրերին: Մի դեպքում էլ որոշ ազգայնամոլներ քարեր են նետել հայ բռնցքամարտիկների ուղղությամբ և հակահայկական վանկարկումներ արել: Հայաստանի պատվիրակությունն ավելի ուշ հաղորդել է, որ հայ մարզիկներից ոչ մեկը երկրպագուների ագրեսիվ գործողություններից վնասվածքներ չի ստացել:

Լեռնային Ղարաբաղի շուրջ Հայաստանի և Ադրբեջանի միջև լարված հարաբերությունների հետևանքով երկու հանրապետությունների մարզիկները հազվադեպ և հույժ անհրաժեշտության դեպքում են մեկնում հարևան երկիր` մասնակցելու որևէ մրցաշարի կամ առաջնության, այն էլ` միայն միջազգային անվտանգության մեծ երաշխիքների պայմաններում:

Բաքվում ընթացող առաջնությանը մասնակցելը կարևոր էր հայ բռնցքամարտիկների համար, քանի որ առաջին ութ տեղերը զբաղեցրած մարզիկները կվաստակեն նաև Լոնդոնում ամռանը կայանալիք օլիմպիական խաղերի ուղեգիր: