Շախմատի միջազգային կառավարող մարմնի` ՖԻԴԵ-ի վերջերս հրապարակած վարկանիշային աղյուսակի 5-րդ հորիզոնականը զբաղեցնում է Հայաստանի առաջատար գրոսմայստեր Լևոն Արոնյանը:

Մայիսի 1-ին ՖԻԴԵ-ի հրապարակած վարկանիշային աղյուսակի, որում ընդգրկված են 100 շախմատիստ, առաջին յոթ հորիզոնականները մնացել են անփոփոխ: Առաջատարների եռյակում են նորվեգացի 20-ամյա Մագնուս Կարլսենը (2813), բուլղարացի Վեսելին Տոպալովը (2812) և ռուսաստանցի Վլադիմիր Կրամնիկը (2790): Հնդիկ Վիշվանաթան Անանդը, որն այժմ պաշտպանում է աշխարհի չեմպիոնի կոչումը Տոպալովի հետ մրցապայքարում, 4-րդ հորիզոնականում է` 2789 նիշով: 27-ամյա հայազգի շախմատիստը նրանցից հետ է մնում 6 նիշով: Ադրբեջանցի Շահրիար Մամեդյարովը հաջորդում է Արոնյանին` զբաղեցնելով 6-րդ հորիզոնականը` 2763 նիշ:

ՖԻԴԵ-ի (www.fide.com) վարկանիշային աղյուսակի 100 տղամարդ շախմատիստների թվում են Հայաստանը ներկայացնող ևս երկու գրոսմայստերներ` Վլադիմիր Հակոբյանը (43-րդը) և Գաբրիել Սարգսյանը (55-րդը): Սլովակիան ներկայացնող Սերգեյ Մովսիսյանն աղյուսակում 25-րդն է:

ՖԻԴԵ-ի վարկանիշային աղյուսակի կին 100 գրոսմայստերների թվում են երեք հայազգի գրոսմայստերներ: Նրանցից առաջինը Լիլիթ Մկրտչյանն է (26-րդ հորիզոնականում` 2477 նիշով), երկրորդը` Էլինա Դանիելյանը (29-րդ) և երրորդը Լիլիթ Գալոյանն է (66-րդ): Կանանց վարկանիշային աղյուսակը գլխավորում է Յուդիթ Փոլգարը (2682):

139 երկրների շարքում 10-ական լավագույն շախմատիստների միջին վարկանիշով Հայաստանը 10-րդն է (2631 ընդհանուր վարկանիշով` Հայաստանն ունի 20 գրոմայստեր, 30 միջազգային վարպետ և ընդհանուր առմամբ կոչումներ ունեցող 73 շախմատիստ):

ՖԻԴԵ-ի երկրների վարկանիշային աղյուսակը գլխավորում է Ռուսաստանը (2731): Երկրորդ հորիզոնականում է Ուկրաինան (2688), երրորդում` Չինաստանը (2648): Վարկանիշային ամբողջական աղյուսակին կարող եք ծանոթանալ այստեղ http://ratings.fide.com/topfed.phtml

Մինչ այդ, Հայաստանի լավագույն շախմատիստ Արոնյանը նշել է, որ չի մասնակցի շախմատի աշխարհի առաջնությանը, եթե դրա անցկացման վայրը ընտրվի Ադրբեջանի մայրաքաղաք Բաքուն:

Անցյալ շաբաթ հրապարակած հայտարարությունում Արոնյանն արձագանքել էր ՖԻԴԵ-ի նախագահ Կիրսան Իլյումժինովի խոսքին, որը ռուսաստանյան «Սպորտ-էքսպրես» թերթին (2010 թ. ապրիլի 28-ին) տված հարցազրույցում ասել էր, թե չի բացառում Ադրբեջանի մայրաքաղաքում անցկացվելիք հավակնորդների մրցաշարին հայազգի շախմատիստի մասնակցությունը:

Արոնյանը հայտարարել է, որ «երբեք չի համաձայնել և չի համաձայնի» մասնակցել թեկնածուների խաղերին Բաքվում: Խնդրի առնչությամբ Հայաստանի շախմատի ֆեդերացիան նույնպես հայտարարել է, որ պաշտոնական նամակով դիմել է Իլյումժինովին, ՖԻԴԵ-ի նախագահական խորհուրդ, «Սպորտ-էքսպրես» թերթ և շախմատային կյանքը լուսաբանող այլ պարբերականներ:

Հավակնորդների մրցաշարում, որին կմասնակցեն ութ շախմատիստ (այդ թվում` 2008-2009 թթ. ՖԻԴԵ-ի «Գրան պրի» մրցանակի հաղթող Արոնյանը), կորոշվի 2011 թ. աշխարհի առաջնության չեմպիոնի հավակնորդը:

Ինչպես հաղորդվում է` ՖԻԴԵ-ի կոնգրեսն անցյալ տարի որոշել է 2010-2011 թթ. մրցաշարը բաժանել երկու մասի, ինչը հնարավորություն կտա հայ շախմատիստին խուսափելու Ադրբեջանում խաղալուց:

(Աղբյուրը` ՖԻԴԵ, armchess.am)