Ռուսաստանի Կազան քաղաքում ընթացող աշխարհի չեմպիոնի կոչման հավակնորդների մրցախաղերի քառորդ եզրափակչում, որտեղ յուրաքանչյուր մասնակից չորս հանդիպում պետք է անցկացնի, Արոնյանի առաջին հակամարտությունը Ռուսաստանը ներկայացնող Ալեքսանդի Գրիշչուկի հետ ավարտվել է խաղաղ դաշինքով:

Մայիսի 3-27-ն ընթացող մրցաշարին մասնակցում են աշխարհի 8 առաջատար գրոսմայստերներ (Արոնյանը, ըստ ՖԻԴԵ-ի, նրանցից ամենաբարձր վարկանիշն ունի): Այս մրցաշարում, որտեղ պարտվողը դուրս է մնում հետագա պայքարից, կորոշվի, թե ով է հաջորդ տարի ձեռնոց նետելու աշխարհի ներկայիս չեմպիոն հնդիկ Վիշվանաթան Անանդին:

Հինգշաբթի Գրիշչուկի հետ քառորդ երզրափակչի չորս խաղերից առաջինում Արոնյանը խաղում էր սպիտակ խաղաքարերով և ողջ խաղի ընթացքում ակտիվ պայքարում էր` լուրջ խնդիրներ ստեղծելով ռուս գրոսմայստերի համար: Մի պահ նույնիսկ Արոնյանի հաղթանակը կասկածից վեր էր թվում:

Խաղի մեկնարկից յոթ ժամ անց սպիտակները դեռևս ձգտում էին հաղթանակի, սակայն մի պահ սևերին հաջողվեց ոչ-ոքիի հավանականությունը հասցնել 50 տոկոսի: 70 քայլից հետո, երբ Գրիշչուկի` հաշտության դաշինք կնքելու հավանականությունը շարունակում էր 50 տոկոս մնալ, մրցակիցները ժամանակի առումով ցայտնոտի մեջ հայտնվեցին, և Արոնյանը ստիպված եղավ բավարարվել ոչ-ոքիիով: Երկրորդ թեժ մրցափուլը տեղի կունենա ուրբաթ, և իմաստուն խաղի հայ վարպետը հանդես կգա սև խաղաքարերով:

Քառորդ եզրափակչի չորս հանդիպումները կավարտվեն մայիսի 8-ին: Ոչ-ոքիի դեպքում մրցակիցները կշարունակեն պայքարը մայիսի 9-ին, մինչև որոշվի հաղթողը, որն էլ կանցնի կիսաեզրափակիչ, որտեղ կհանդիպի քառորդ եզրափակչի մյուս` Վլադիմիր Կրամնիկ (Ռուսաստան)-Թեյմուր Ռաջաբով (Ադրբեջան) զույգի հաղթողի հետ: Քառորդ եզրափակչի մյուս երկու զույգերն են Վեսելին Տոպալովը (Բուլղարիա)-Գատա Կամսկին (ԱՄՆ) և Բորիս Գելֆանդ (Իսրայել)-Շահրիար Մամեդյարովը (Ադրբեջան): (Առաջին մրցափուլի բոլոր չորս խաղերն ավարտվել են ոչ-ոքիի):

Աշխարհի չեմպիոնին ձեռնոց նետելու Արոնյանի նախորդ` 2007 թ. փորձն ավարտվել է անհաջողությամբ, քանի որ 8 խաղացողների մասնակցությամբ հավակնորդների մրցաշարում հայազգի գրոսմայստերն իր մրցելույթներն ավարտել էր ընդամենը 7-րդ տեղում:

(Մրցաշարի մասին մանրամասն կարող եք ծանոթանալ այստեղ http://kazan2011.fide.com).