Ուրբաթ երևանյան մամուլի ակումբներից մեկում լրագրողները շամպայնով ու շնորհավորանքներով դիմավորեցին շախմատի Հայաստանի հավաքականի անդամներին, որոնք այս շաբաթվա սկզբին հաղթող էին ճանաչվել Չինաստանի Նինբո քաղաքում անցկացված շախմատի աշխարհի ութերորդ առաջնությունում:

Անպարտելի մնալով թիմային մակարդակում և անհատական փայլուն խաղ ցուցադրելով` Հայաստանի հավաքականն ինը տուրից բաղկացած մրցաշարում պարտության է մատնել այնպիսի հզոր շախմատային գերտերությունների, ինչպիսիք են` Չինաստանը, Հնդկաստանը, Իսրայելը և այլն:

Հավաքականի մարզիչ Արշակ Պետրոսյանն ասում է, որ մրցաշարին մասնակցող տասը հավաքականների միջին գործակիցը շատ բարձր էր, ինչն ավելի էր դժվարացնում պայքարը չեմպիոնի կոչման համար:

«Ծանր, դժվար, ուժեղ մրցակցություն էր: Շատ ուրախ ենք, որ մեզ հաջողվեց առանց պարտությունների անցկացնել այդ մրցումը և նվաճել հաղթանակը: Թեժ պայքար էր, և պատկերացրեք, որ Ռուսաստանի թիմը, որի միջին գործակիցը 2756 էր, երեք անգամ պարտության մատնվեց: Սա խոսում է այն մասին, թե որքան ուժեղ էին մասնակից թիմերը»,- ասում է Պետրոսյանը:

Սա Հայաստանի հավաքականի առաջին հաղթանակը չէր միջազգային խոշոր մրցաշարում: Հայ շախմատիստները թիմային մակարդակով երկու անգամ անընդմեջ հաղթանակ են տոնել շախմատի օլիմպիադայում 2006 և 2008 թթ:

Չորրորդ խաղատախտակի մոտ հանդես եկող Հայաստանի ընտրանու անդամներից Գաբրիել Սարգսյանն ասում է, որ արդեն հինգերորդ մրցափուլից հետո, երբ հայ շախմատիստները պարտության էին մատնել հյուրընկալող թիմին` Չինաստանի ընտրանուն, հավաքականի անդամները համոզված էին, որ հաղթելու են այս առաջնությունում:

«Խաղում էին ուժեղագույնները, բայց քանի որ մենք բազմիցս հաղթել ենք, մեզ մոտ այդ հաղթողի հոգեբանությունը կա: Խաղալուց էական չէր, թե որ թիմի հետ ենք խաղում, ավելի դժվար էր վերջում, երբ մոտենում էինք մեր նպատակին ու գիտեինք, որ հաղթելու ենք»,- ասում է երիտասարդ գրոսմայստերը:

Ըստ մասնագետների` Հայաստանի շախմատի հավաքականի հաջողությունը թիմային ոգի ունենալու մէջ է:

«Բոլորը մեկի և մեկը բոլորի համար. սա´ է խոսում մեր թիմում: Մթնոլորտը մեզ մոտ ընտանեկան է, ինչը շատ կարևոր է թիմային մրցումների ժամանակ: Բոլորը լինում են նպատակասլաց, ուզում են ինչ-որ բանի հասնել: Կանգնած են իրար մեջքի»,-բացատրում է հավաքականի մարզիչը:

Նինբոյում Հայաստանը ներկայացնում էին նաև ՖԻԴԵ-ի վարկանիշային աղյուսակով երրորդ ուժեղագույն շախմատիստ Լևոն Արոնյանը (առաջին խաղատախտակի մոտ), գրոսմայստերներ Սերգեյ Մովսիսյանը և Վլադիմիր Հակոբյանը, համապատասխանաբար` երկրորդ և երրորդ խաղատախտակների մոտ, և պահեստային խաղացող Ռոբերտ Հովհաննիսյանը: