Նոր տարին բարի լուր բերեց հայ գրոսմայստեր Լևոն Արոնյանի համար. 2012 թ. հունվարին հրապարակված ՖԻԴԵ-ի վարկանիշային դասակարգման աղյուսակով՝ Արոնյանն աշխարհի երկրորդ լավագույն շախմատիստն է:

Շախմատի միջազգային մարմնի 100 լավագույն շախմատիստների աղյուսակում, որը հրապարակվում է յուրաքանչյուր երկու ամիսը մեկ, երկրորդ հորիզոնականը զբաղեցնելը ռեկորդային ցուցանիշ է 29-ամյա հայ շախմատիստի համար, որը 2010 թ. նոյեմբերին հաղթահարելով 2800 վարկանիշային շեմը (այդ ցուցանիշով Արոնյանը վեցերորդ շախմատիստն է աշխարհում)` հանգրվանել էր երրորդ հորիզոնականում:

Ներկայումս իր ակտիվում ունենալով 2805 միավոր՝ Արոնյանը 30 միավորով զիջում է դասակարգման վարկանիշային աղյուսակի վերին հորիզոնականը զբաղեցնող նորվեգացի Մագնուս Կարլսենին և 4 միավորով առաջ է անցել աշխարհի նախկին չեմպիոն Վլադիմիր Կրամնիկից (Ռուսաստան):

ՖԻԴԵ-ի աշխարհի 100 լավագույն շախմատիստների աղյուսակում (www.fide.com) ընդգրկվել են նաև Սերգեյ Մովսիսյանը (43-րդ հորիզոնական, 2700 միավոր), Վլադիմիր Հակոբյանը (64-րդ հորիզոնական, 2685 միավոր) և Գաբրիել Սարգսյանը (66-րդ հորիզոնական, 2700 միավոր):

ՖԻԴԵ-ի 100 լավագույն կին շախմատիստների ցուցակում ընդգրկվել են երեք հայ շախմատիստուհիներ: Նրանցից ամենաբարձր հորիզոնականը զբաղեցրել է Էլինա Դանիելյանը (20-րդ հորիզոնական, 2490 միավոր), նրան հաջորդում է Լիլիթ Մկրտչյանը (31-րդ հորիզոնական, 2458 միավոր) և Լիլիթ Գալոյանը (97-րդ հորիզոնական, 2366 միավոր): Վարկանիշային աղյուսակը 2710 միավորով գլխավորում է հունգարացի Յուդիթ Փոլգարը:

125 շախմատային երկրների թվում, որոնց վարկանիշային դասակարգման համար հիմք է ընդունվել տվյալ երկրի 10 լավագույն շախմատիստների միջին վարկանիշը, Հայաստանը նոյեմբերի համեմատությամբ մեկ հորիզոնականով բարելավել է իր դիրքը և ներկայումս 5-րդ հորիզոնականում է (միջին վարկանիշը 2657 միավոր, ունի 33 գրոսմայստեր, 22 միջազգային վարպետ, «ընդհանուր տիտղոսակիր»` 84 շախմատիստ):

ՖԻԴԵ-ի երկրների վարկանիշային դասակարգման աղյուսակը գլխավորում է Ռուսաստանը (2748 միավոր), որին հաջորդում են Ուկրաինան (2693 միավոր), Ֆրանսիան (2661 միավոր) և Հունգարիան (2657 միավոր):