Անյալ շաբաթվա վերջին Հայաստանի ֆուտբոլի ֆեդերացիայի (ՀՖՖ) նախագահը, ներկայացնելով Հայաստանի հավաքականի նորանշանակ մարզչին, ասաց, որ վերջին մոտ մեկ տասնամյակում առաջին անգամ գլխավոր մարզչի պաշտոնում հայ մարզիչ է նշանակվել: Ռուբեն Հայրապետյանը կոչ արեց համախմբվել նրա շուրջը:

ՀՖՖ նախագահ Ռուբեն Հայրապետյանը հերքեց այն կարծիքը, թե մարզչի պաշտոնակատար Վարդան Մինասյանին մինչև «Եվրո-2012» որակավորման փուլի ավարտը հավաքականի գլխավոր մարզիչ նշանակելը կապված է ՀՖՖ ֆինանսական խնդիրների հետ:

«Նախագահի պաշտոնում իմ 8 տարվա գործունեության ընթացքում ես ասել եմ, որ Հայաստանում չկա մարզիչ, ով կկարողանա գլխավորել Հայաստանի հավաքականը։ Բայց այժմ հայտնվել է մասնագետ, որ դա կարող է անել։ Վարդան Մինասյանը կարողացավ ինձ ապացուցել, որ լուրջ մարզիչ է»,- ասաց Հայրապետյանը` հավելելով, որ եթե Մինասյանը հաջողություններ ունենա, ապա պայմանագրի ժամկետի ավարտից հետո նույնպես կգլխավորի հավաքականը։ (www.ffa.am)

Ուրբաթ տեղի ունեցած մամուլի ասուլիսի ընթացքում Հայրապետյանն ասաց. «Վերջին ութ տարիների ընթացքում առաջին անգամ գլխավոր մարզչի պաշտոնում հայ մարզիչ է նշանակվել: Կցանկանայի, որ բոլորս միասին օգնենք հավաքականին, նպաստենք նրա հաջող ելույթներին»:

Անցյալ տարվա ապրիլից` դանիացի Յան Պոուլսենից հետո, Մինասյանը Հայաստանի հավաքականի մարզչի պաշտոնակատարն էր: ՀՖՖ-ն Մինասյանին գլխավոր մարզչի պաշտոնում նշանակելու մասին հայտնեց փետրվարի սկզբին: 2002-ից Հայաստանի հավաքականը գլխավորել են օտարերկրացի մարզիչներ: Մինասյանից առաջ բոլոր մարզիչներին, բացի Իըն Փորթերֆիլդից (2006-2007 թթ.), ՀՖՖ-ն ազատել է աշխատանքից թիմի անհաջող ելույթների պատճառով: Հավաքականը համեմատաբար լավ արդյունքներ ցույց տվեց շոտլանդացի մարզչի ղեկավարությամբ, սակայն 2007 թ. սեպտեմբերին նա մահացավ քաղցկեղից:

Մինասյանը, որը կհամատեղի «Փյունիկ» ակումբի մարզչի պարտականությունները հավաքականի գլխավոր մարզչի պաշտոնի հետ, կանգնած է դժվարին խնդրի առաջ` բարելավելու պաշտոնական խաղերում Հայաստանի հավաքականի արդյունքները: (Մինչև այսօր նրա ղեկավարությամբ Հայաստանն իր հաշվին գրանցել է մեկ հաղթանակ և հինգ պարտություն:) Ուրբաթ լրագրողների հետ հանդիպման ընթացքում Մինասյանն ասաց, որ կաշխատի խթանել մրցակցությունը հավաքականի ներսում` մեկնարկային կազմում հայտավորվելու համար, այդ կերպ հասնելով ավելի բարձր խաղամակարդակի և արդյունքների:

«Եվրո-2012»-ի որակավորման փուլում` B խմբում, Հայաստանի մրցակիցներն են Ռուսաստանը, Սլովակիան, Իռլանդիայի Հանրապետությունը, Մակեդոնիան և Անդորրան: Մրցաշարը կմեկնարկի սեպտեմբերին: