Հայաստանի և Իսրայելի ֆուտբոլի ֆեդերացիաները հաղորդել են, որ պատրաստվում են երկու երկրների ազգային ընտրանիների ընկերական հանդիպում կազմակերպել, որոնք այս աշնանը մեկնարկող Եվրո-2012-ի որակավորման խաղերի նախապատրաստական վերջին փուլում են: Ըստ ռուսական «Սպորտ-էքսպրես» թերթի` այս որոշումը դեռ պետք է հաստատվի Իսրայելի հավաքականի գլխավոր մարզիչ Լուիս Ֆերնանդեսի կողմից:

Եթե վերջնական պայմանավորվածություն ձեռք բերվի, Հայաստանը (ՖԻՖԱ-ի վերջին վարկանիշային աղյուսակում 95-րդն է ավելի քան 200 ազգային ընտրանիների մեջ) օգոստոսի 10-ին Երևանում կհյուրընկալի Իսրայելի հավաքականին (ՖԻՖԱ-ի վարկանիշային աղյուսակում 37-րդն է), որը Հայաստանի ընտրանու համար եզակի ընկերական հանդիպում կլինի ավելի վարձր վարկանիշ ունեցող մրցակցի հետ: (Վերջին տարիներին բարձր վարկանիշ ունեցող թիմի հետ ընկերական հանդիպում Հայաստանի ընտրանին անցկացրել է Հունաստանի հավաքականի հետ: Ֆուտբոլի մասնագետները համակարծիք են, որ ուժեղ ընտրանիների հետ հազվադեպ ընկերական հանդիպումները կամ դրանց բացակայությունն ազդում է թիմի ավելի հաջող ելույթների և պաշտոնական հանդիպումների արդյունքների վրա:)

Այսպիսով, Հայաստանը հնարավոր է դառնա Իսրայելի հավաքականի մրցակից, որը պետք է հանդիպեր Կոտ դ’Իվուարի ընտրանու հետ, սակայն վերջին պահին աֆրիկյան թիմը հրաժարվել է խաղից: Կոտ դ’Իվուարի հավաքականը, որը գլխավորում է Անգլիայի պրեմիեր լիգայի «Չելսի» ֆուտբոլային ակումբի առաջատար խաղացողներից մեկը` Դիդիե Դրոգբան, ներկայումս 26-րդն է ՖԻՖԱ-ի վարկանիշային աղյուսակում, թեև թիմը Հարավային Աֆրիկայում ՖԻՖԱ-ի անցկացված վերջին աշխարհի առաջնության մեկնարկային փուլում պարտություն կրելուց հետո դուրս մնաց հետագա պայքարից:

Այս տարի նոր մարզչի` Վարդան Մինասյանի գլխավորությամբ Հայաստանի հավաքականը երկու ընկերական հանդիպում է ունեցել` 1:3 հաշվով պարտվելով Բելառուսին և 3:1 հաղթելով Ուզբեկստանի ընտրանուն:

Եվրո-2012 որակավորման խաղերում Հայաստանն իր պայքարը կմեկնարկի սեպտեմբերի 3-ին` հյուրընկալելով խմբի առաջատար թիմերից մեկին` Իռլանդիայի ընտրանուն: Որակավորման փուլում Հայաստանի ընտրանու մրցակիցներն են Ռուսաստանը, Սլովակիան, Մակեդոնիան և Անդորրան: