Այս տարի Եվրոպայի ակումբային մրցաշարերում Հայաստանի վերջին հույսը` «Միկա» ֆուտբոլային ակումբը, չկարողացավ չեզոքացնել մեկ գոլի տարբերությունը և անցնել ՈՒԵՖԱ-ի Եվրոպայի լիգայի որակավորման հաջորդ փուլ, որտեղ նրա մրցակիցը կլիներ ճանաչված անգլիական «Լիվերպուլ» ակումբը:

Թեև հինգշաբթի երևանյան ակումբը սեփական հարկի տակ երկրպագուների ներկայությամբ մեծ խանդավառությամբ էր խաղում` «Միկայի» ֆուտբոլիստներին չհաջողվեց նյութականացնել բազմաթիվ գոլային հնարավորությունները` Մակեդոնիայի «Ռաբոտնիչկի» թիմի հետ խաղն ավարտելով 0:0 հաշվով: Երկու թիմերի միջև Սկոպիեում կայացած առաջին հանդիպումն ավարտվել էր մակեդոնական թիմի հաղթանակով (1:0):

Երևանյան ակումբի համար բազմաթիվ կորցրած հնարավորություններով խաղում եղավ նաև առնվազն մեկ վիճահարույց դրվագ. մրցավարը երկու անգամ փոխեց իր որոշումն այն բանից հետո, երբ «Ռաբոտնիչկիի» դարպասապահը կոպիտ խաղաց «Միկայի» հարձակվողի նկատմամբ: Իր օգնականի հետ խորհրդակցելով` չեխ մրցավարը ձեռնպահ մնաց առաջին խաղակեսի վերջնամասում մակեդոնական թիմի դարպասին 11 մետրանոց հարված նշանակելուց: «Միկան» շարունակեց ճնշում գործադրել, սակայն այդպես էլ չկարողացավ հաջողության հասնել:

«Միկան» ավարտեց, այսպես ասած, ևս մեկ ձախողված մրցաշրջան հայաստանյան թիմերի համար եվրոպական ակումբային մրցաշարերում: Ավելի վաղ Հայաստանի տիտղոսակիր «Փյունիկ» ակումբը նույնպես լքել էր ՈՒԵՖԱ-ի չեմպիոնների լիգան` որակավորման երկրորդ փուլում պարտվելով Սերբիայի «Պարտիզանին»: «Բանանցը» և «Ուլիսը», որոնք մասնակցում էին մեկ այլ համաեվրոպական ակումբային մրցաշարի` ՈՒԵՖԱ-ի Եվրոպայի լիգային, առաջին իսկ մրցափուլում դուրս մնացին հետագա պայքարից` պարտվելով համապատասխանաբար «Անարտոսիսին» (Կիպրոս) և «Բնեյ Եհուդային» (Իսրայել):

Եվրոպական գավաթի մրցաշարերում այս ամառ ութ խաղերում հայաստանյան ակումբները կրել են վեց պարտություն և կարողացել են ընդամենը երկու գոլազուրկ ոչ-ոքի գրանցել: (Չորս թիմերը ութ խաղում խփել են ընդամենը մեկ գնդակ` բաց թողնելով տասը:)

Անկախությունից հետո, երբ 1990-ականներին Հայաստանն անդամակցեց եվրոպական ֆուտբոլի կառավարող մարմնին, ոչ մի հայաստանյան ֆուտբոլային ակումբի չի հաջողվել հանդես գալ եվրոպական մրցաշարերի հիմնական փուլերում: