Francefootball.fr ամսագրին տված հարցազրույցում 1998 թ. աշխարհի չեմպիոն Յուրի Ջորկաեֆն ասել է, որ կցանկանար մարզել Հայաստանի ֆուտբոլի ազգային հավաքականը:
42-ամյա ֆրանսիահայ ֆուտբոլիստ Ջորկաեֆն ասել է, որ Հայաստանի ֆուտբոլի ֆեդերացիայից պաշտոնական առաջարկ չի ստացել, «սակայն եթե մի օր առաջարկեն ստանձնել Հայաստանի հավաքականի մարզչի պաշտոնը, ես կմտածեմ այդ մասին»,- հրապարակման համաձայն ասել է նա:
«Հայրս` Ջինը, մարզել է Հայաստանի ազգային հավաքականը: Հաճելի կլիներ, եթե մի օր էլ ես դառնայի Հայաստանի ընտրանու մարզիչը»,- հավելել է նա:
Ջորկաեֆը, որի մայրը հայ է, որպես հարձակվող կամ առաջ քաշված կիսապաշտպան խաղացել է մի շարք առաջատար եվրոպական թիմերում, այդ թվում` «Պարի Սեն Ժերմենում» (Ֆրանսիա), «Ինտերնացիոնալում» (Միլան, Իտալիա), «Կայզերսլաութերնում» (Գերմանիա), «Բոլթն Ուոնդերըրզ»-ում (Միացյալ Թագավորություն) և այլն:
Ֆրանսիայի ազգային հավաքականի կազմում Ջորկաեֆը նվաճել է ՖԻՖԱ-ի 1998 թ. աշխարհի գավաթը, իսկ 2000 թ.` Եվրոպայի չեմպիոնի կոչումը:
1999 թ. մեկ այլ ֆրանսիահայ ֆուտբոլիստի և աշխարհի գավաթակիր Ալեն Պողոսյանի հետ Ջորկաեֆը «Եվրո-2000»-ի որակավորման փուլում խաղացել է Երևանում Հայաստանի ընտրանու դեմ, տուգանային հարվածից վճռական գոլի հեղինակ դարձել և հաղթանակ պարգևել «Լե Բլուզին» (Ֆրանսիայի ընտրանին հաղթել է 3:2 հաշվով): Ջորկաեֆին և Պողոսյանին ընդունել է այն ժամանակ ՀՀ նախագահ Ռոբերտ Քոչարյանը, որը նրանց է հանձնել ՀՀ անձնագրեր և, ինչպես հաղորդվում է, նրանց ասել. «Հայաստանը ձեր երկիրն է»:
English
Հայերեն
ՎԵՐԵՎ 
Readers' comments
Post a comment
Comments are welcomed and encouraged. However, comments not pertaining to the topic or containing slander or offensive language will be deleted. You have to be registered to be able leave your comment. Sign in or Register now for free.