Ցանկանում եք երկրպագել ազգային հավաքականին, սակայն սոսկ հայ լինելուց և թիմային մարզաձևում անակնկալ վերելքից զատ, էլ չգիտեք` ինչո՞ւ: Կցանկանա՞ք այս խաղի մեծ գիտակ լինել, բայց չեք: Ցանկանո՞ւմ եք հասկանալ, թե դեղին ու կարմիր քարտերը ինչով են տարբերվում այլ քարտերից, կամ թե այդ կիսաանդրավարտիքով, առաջին հայացքից` սովորական թվացող տղաների պատճառով ինչո՞ւ են մարդիկ այսքան ոգևորվում: Այդ դեպքում սա ձեզ համար է…

- Ինչո՞ւ է այս երեկո Դուբլինում կայանալիք խաղն այսքան կարևոր:
- Այսօր երեկոյան` Հայաստանի ժամանակով 22:45-ին, Հայաստանի հավաքականն անկախությունից ի վեր առաջին անգամ լուրջ հնարավորություն ունի ֆուտբոլի միջազգային մրցաշարին մասնակցելու ուղեգիր ձեռք բերելու համար: Հաղթանակի դեպքում ազգային հավաքականն ՈՒԵՖԱ-ի 2012 թ. Եվրոպայի առաջնության համար պայքարը կշարունակի փլեյ օֆում:

- Ի՞նչ է ՈՒԵՖԱ-ն :
- ՈՒԵՖԱ-ն եվրոպական ֆուտբոլի ընկերակցությունների միություն է: Այն կազմված է 53 անդամ ընկերակցություններից: Հայաստանը նրան անդամակցել է 1992 թ.: Եվրոպական առաջնության որակավորման խաղերը տևում են երկու տարի: Մասնակիցներից 14-ին է հաջողվում ձեռք բերել հիմնական առաջնությանը մասնակցելու ուղեգիր: Մինչ օրս Հայաստանի ընտրանու լավագույն արդյունքը եղել է 2004-ին, երբ ազգային ընտրանին 6 հավաքականներից բաղկացած խմբում զբաղեցրել էր չորրորդ հորիզոնականը: Որակավորման խաղերն անցկացվում են 9 խմբերում: Այս անգամ B խմբում ընդգրկված Հայաստանի մրցակիցներն են Ռուսաստանը, Իռլանդիայի Հանրապետությունը, Սլովակիան, Մակեդոնիայի Նախկին Հարավսլավիայի Հանրապետությունը և Անդորրան: Այս խաղից առաջ Հայաստանի ընտրանին 17 միավորով զբաղեցնում է երրորդ հորիզոնականը և 1 միավորով հետ է մնում Իռլանդիայի ներկայացուցիչներից:

- Միավորներ ասելով նկատի ունեք գոլե՞րը:
- Ո´չ: Միավորները կուտակվում են ողջ մրցաշարի ընթացքում: Հաղթանակի դեպքում թիմը վաստակում է 3, ոչ-ոքիի դեպքում` 1, պարտության դեպքում` 0 միավոր:

- Ի՞նչ կլինի, եթե Հայաստանի հավաքականն այս երեկո հաղթի:
- Հաղթանակը Հայաստանին հնարավորություն կտա նոյեմբերին մասնակցելու փլեյ օֆ կանոնակարգով անցկացվելիք մրցաշարին, որտեղ երկու խաղ կխաղա մյուս 7 խմբերում երկրորդ տեղը նվաճած թիմերից մեկի հետ: Փլեյ օֆում հաղթողները ձեռք կբերեն ուղեգիր` մասնակցելու «Եվրո-2012»-ի առաջնությանը, որը կանցկացվի գալիք տարվա ամռանը Լեհաստանում և Ուկրաինայում:

- Ի՞նչ կլինի, եթե Հայաստանի ընտրանին պարտվի այս երեկո:
- Այդ դեպքում Հայաստանի հավաքականը խմբում կզբաղեցնի երրորդ հորիզոնականը, իսկ փլեյ օֆում իր բախտը կփորձի Իռլանդիայի ընտրանին: Այդուհանդերձ դա կլինի Հայաստանի ներկայացուցիչների մեծագույն նվաճումը` տեղի, միավորների, գոլերի տարբերության և այլ առումներով:

- Ի՞նչ կլինի, եթե խաղն ավարտվի ոչ-ոքի:
- Այդ դեպքում նույնպես Հայաստանը կզբաղեցնի երրորդ տեղը` առաջին երկու տեղերը զիջելով համապատասխանաբար Ռուսաստանի և Իռլանդիայի ընտրանիներին:

- Բացի այն, երբ խաղացողները վայր են ընկնում` ասես դիպուկահարի գնդակից, կամ ինչ-որ մեկը բղավում է` գո~ո~ո~ոոոոոոոոոոլ, ես գաղափար չունեմ` ի´նչ է տեղի ունենում դաշտում (եթե չեմ սխալվում` դրան մարզադաշտ եք ասում, չէ՞): Այսինքն` բացի հաշվից, էլ ինչպե՞ս կարող եմ իմանալ, որ Հայաստանը լավ է խաղում:
- Այս երեկո Հայաստանի ընտրանին պետք է ապավինի ամուր պաշտպանությանը, գնդակի տիրապետմանը կիսադաշտում, ճշգրիտ փոխանցումներին և կոմբինացիոն խաղին: Նման դեպքում հնարավոր կլինի գոլային պահեր ստեղծել մրցակցի դարպասի մատույցներում և հուսալ, որ Հայաստանի հավաքականում ընդգրկված ռմբարկուները կօգտագործեն հակառակորդի սարդոստայնը խոցելու իրենց ընդունակությունները:

- Ո՞ր հայ ֆուտբոլիստների խաղին պետք է հատկապես հետևեմ:
- Ըստ էության` բոլոր 11-ի (այդ թվում` երեք հնարավոր փոխարինման դուրս եկող ֆուտբոլիստների): Հատկապես պետք է հետևել հարձակվողներ Յուրա Մովսիսյանի, Մարկոս Պիզելիի, Գևորգ Ղազարյանի, կիսապաշտպան Հենրիխ Մխիթարյանի, դարպասապահ Ռոման Բերեզովսկու և այլոց խաղին:

- Ո՞ր իռլանդացի խաղացողներին պետք է (թշնամու աչքով) հետևեմ:
- Իռլանդացի առանցքային խաղացող Ռոբի Քինի բացակայության պայմաններում պետք է ուշադրություն դարձնել նրան փոխարինող Սայմն Քոքսին: Մյուս փորձառու խաղացողներից են դարպասապահ Շայ Գիվընը, որը նաև թիմի ավագն է, «Մանչեսթեր յունայթեդի» նախկին պաշտպան Ջոն Օ’Շին, «Չելսիի» նախկին կիսապաշտպան Դեմիըն Դաֆը, Մոսկվայի «Սպարտակի» եզրային հարձակվող Այդն ՄքԳեդին և այլք:

- Շատ ուշ է Դուբլին թռչելու համար: Ինչպե՞ս կարող եմ հետևել խաղին:
- Խաղը կհեռարձակվի Հայաստանի հանրային հեռուստաընկերությամբ («Հ1»): Հանդիպումը կմեկնարկի Երևանի ժամանակով 22:30-ին: Հայաստան-Իռլանդիա դիմակայությունը կարելի է դիտել նաև www.uefa.com-ում: Ակնկալվում է, որ հայ մարզասերները կհավաքվեն նաև օպերայի շենքի առջևում գտնվող Ֆրանսիայի հրապարակում` երկրպագելու իրենց սիրելի թիմին մեծ էկրանների վրա: