Select edition
English
Հայերեն
տեղական լուրեր, գլոբալ լսարան
Չորեքշաբթի, մայիսի 23, 2012 Թարմացված է 04:17
Որոնել
Ֆուտբոլային հույսեր. թեժ մրցաշրջանից հետո Հայաստանի ազգային հավաքականի մարզիչը վստահ է թիմի ապագայի հարցում
Մամուլի ասուլիսի ժամանակ Մինասյանը նաև ասել է, որ թեև իր գլխավորած թիմը B խմբում ամենագեղեցիկ ֆուտբոլը ցուցադրեց, սակայն նաև շեշտել է, թե հավաքականը «դեռ ճանապարհի կեսին է» և «դեռ լրիվ չի կայացել»: Մինասյանի խոսքով` Հայաստանի հավաքականին պակասում էր փորձը, մասնավորապես Իռլանդիայի հետ խաղում, որտեղ Հայաստանը 2:1 հաշվով պարտվեց Դուբլինում: Ցավալի պարտությունն ի չիք դարձրեց գալիք տարվա ամռանը Լեհաստանում և Ուկրաինայում կայանալիք Եվրոպայի առաջնությանը մասնակցելու Հայաստանի հույսերը: Խմբային փուլում Հայաստանի ընտրանին հինգ հաղթանակ է տոնել, այդ թվում` երկու դիտարժան մրցելույթ Սլովակիայի հավաքականի դեմ (3:1 հաշվով հաղթել է Երևանում, 4:0 հաշվով` Ժիլինայում): Անցումային փուլ մտնելու համար Հայաստանին Դուբլինում անհրաժեշտ էր հաղթանակ, սակայն անաչառ մասնագետների խոսքով` 26-րդ րոպեին իսպանացի մրցավարի խիստ վիճահարույց որոշման պատճառով Հայաստանի հավաքականի փորձառու դարպասապահ Ռոման Բերեզովսկու խաղից հեռանալը ծանր հարված էր, որը ցավալի հետևանք ունեցավ Հայաստանի համար: Այդուհանդերձ, 2010 թ. սեպտեմբերից մինչև 2011 թ. հոկտեմբեր անցկացված մրցաշրջանում հավաքականի ձեռք բերած արդյունքը դրվատանքի արժանացավ և դիտվեց որպես հաջողության նշան մի հավաքականի համար, որը վերջին շրջանում առանձնապես աչքի չէր ընկնում հաղթանակներով: Մինասյանն ասել է, որ վերակնքել է Հայաստանի ֆուտբոլի ֆեդերացիայի հետ իր պայմանագիրը և կշարունակի գլխավորել հավաքականը: «Հավաքականի գլխավոր մարզիչ լինելը մեծ պատիվ և պատասխանատվություն է ինձ համար»,- ասել է Մինասյանը: Խոսելով հավաքականի հեռանկարների մասին` Մինասյանն ասել է, որ հավաքականի կորիզն արդեն ձևավորվել է, և խաղացողները որոշակի ձեռագիր են ձեռք բերել: «Այսօր հավաքականն ունի իր դեմքը: Հիմնականում երիտասարդներից է կազմված կորիզը, նրանց հետ են նաև [դարպասապահ] Ռոման Բերեզովսկին և [պաշտպան] Սարգիս Հովսեփյանը: Այս թիմի պոտենցիալն ավելի մեծ է: Այս լավ արդյունքը լավ խաղի շնորհիվ է», - ասել է Մինասյանը, որը գլխավորում է նաև «Փյունիկ» ֆուտբոլային ակումբը: Մինչ այս տարի թիմը, հանդես գալով Հայաստանի բարձրագույն խմբի առաջնությունում, մեկ տասնամյակ պահպանել է չեմպիոնի տիտղոսը: «ԱրմենիաՆաուի» հարցին, թե արդյոք հավաքականում իր զբաղվածության պատճառո՞վ է, որ «Փյունիկն» այս տարի չի գլխավորում Հայաստանի ընթացիկ առաջնության մրցաշարային աղյուսակը, Մինասյանը պատասխանել է. «Մեր թիմի միջին տարիքը 17-18 տարեկան է: Ես շատ հանգիստ եմ վերաբերվում այս մրցաշրջանին: Սա կայացման տարի է: Երիտասարդներ են, և անկայունություն կա: Ես շատ գոհ եմ այս պահին նրանց ցուցադրած խաղով: Կարծում եմ` «Ուլիսն» այս տարի արժանի է չեմպիոն դառնալուն, քանի որ ավելի փորձառու է և կայուն խաղ է ցուցադրում»: Հավաքականի գլխավոր մարզիչը նաև ասել է, թե իր տեսադաշտում կան ֆուտբոլիստներ` երիտասարդական և 19 տարեկանների հավաքականներում, որոնց ցանկանում է ներգրավել ազգային հավաքականում: «Մեր ուշադրության կենտրոնում են նաև արտերկրում հանդես եկող մեր հայրենակիցները»,- ասել է Մինասյանը` նման ֆուտբոլիստների շարքում նշելով «Կռիլյա սովետով»-ում (Ռուսաստան) ելույթ ունեցող Ռոման Գրիգորյանի անունը: 2014 թ. կայանալիք աշխարհի առաջնության որակավորման խաղերը կմեկնարկեն գալիք տարվա սեպտեմբերին: B խմբում Հայաստանի մրցակիցներն են Իտալիան, Դանիան, Չեխիան, Բուլղարիան և Մալթան:
Other Articles in Ֆուտբոլ
|
  |
ԱրմենիաՆաուի էջերում
.jpg "Ղարաբաղի հարց. կարո՞ղ է արդյոք ամենափոքր նահանգի բանաձևը Արևմուտքի վերաբերմունքը Հայաստանի նկատմամբ փոխելու նշան դառնալ")
ՎԵՐԵՎ | Կատեգորիաներ | Resources | About | Site map | ԱրմենիաՆաուի Հաշիվ |
|---|---|---|---|---|
Readers' comments
Post a comment
Comments are welcomed and encouraged. However, comments not pertaining to the topic or containing slander or offensive language will be deleted. You have to be registered to be able leave your comment. Sign in or Register now for free.