Մինսկում մեկնարկած ծանրամարտի Եվրոպայի 2010 թ. առաջնությունում հիանալի մեկնարկեց Հայաստանի հավաքականը: 56 կգ քաշայինների պայքարում արծաթե մեդալ նվաճեց Սմբատ Մարգարյանը, ով ընդամենը 16 տարեկան է: Սմբատը հանդիսանում էր այս քաշային կարգի ամենակրտսեր և ամենաթեթև մարզիկը, սակայն դա նրան չխանգարեց դանռալ Եվրոպայի փոխչեմպիոն:

Արդեն տեղեկացրել էինք, որ Մարգարյանը ելույթ էր ունեցել Բ խմբում: Պոկում վարժությունում բարձրացնելով 109 կգ, հրումում` 146 կգ, Սմբատը երկամարտի 255 կգ արդյունքով սպասում էր Ա խմբի մասնակիցների ելույթներին: Այստեղ հանդես եկան մի շարք փորձառու ծանրորդներ, սակայն նրանցից միայն բելառուս Վիտալի Դերբենևին հաջողվեց առաջ անցնել հայ պատանուց: Դերբենևը ընդամենը մեկ կգ-ով գերազանցեց Մարգարյանին` երկամարտում ցույց տալով 256 կգ արդյունք: Ամեն դեպքում, Սմբատ Մարգարյանի հրում վարժությունում ցույց տված 146 կգ-ն մնաց անգերազանցելի և հայ մարզիկը ստացավ նաև փոքր ոսկե մեդալ: Այս, ինչպես նաև երկամարտի Մարգարյանի արդյունքները Եվրոպայի պատանիների նոր ռեկորդներ էին:

Ռուսաստանի դրոշի ներքո հանդես եկավ հայ ծանրորդ Արսեն Թամրազյանը, ով երկամարտում ցույց տվեց 238 կգ արդյունք և գրավեց 9-րդ հորիզոնականը:

56 կգ. Լավագույն տասնյակ

1. Վիտալի Դերբենև (Բելառուս) - 256
2. Սմբատ Մարգարյան (Հայաստան) - 255
3. Թոմ Գոգեբուր (Բելգիա) - 254
4. Գոխան Կիլիչ (Թուրքիա) - 251
5. Յուրի Դուդոգլո (Մոլդովա) - 249
6. Սեդատ Արտուց (Թուրքիա) - 247
7. Իգոր Գրաբուսեա (Մոլդովա) - 245
8. Ասեն Մուրադով (Բուլղարիա) - 241
9. Արսեն Թամրազյան (Հայաստան) - 238
10. Ֆրանսիսկո Գուրադո (Իսպանիա) - 230

Ի գիտություն. Այս նյութը, ինչպես նաև այս խորագրի ներքո ներկայացվող «ԱրմենիաՆաուի» մյուս նյութերը հրապարակվում են անփոփոխ: «ԱրմենիաՆաուն» պատասխանատվություն չի կրում բովանդակության և թարգմանության համար: