Հինգշաբթի երեկոյան հրում վարժությունում Տիգրան Գ. Մարտիրոսյանի [ոսկե մեդալ նվաճելու] առաջին փորձն անհանգստություն պատճառեց հայ մարզասերներին, քանի որ մրցավարները չարձանագրեցին նրա առաջին մոտեցումը: Սակայն րոպեներ անց 22-ամյա գյումրեցի ծանրորդն արդեն պահել էր գլխավերևում 195 կիլոգրամանոց ծանրաձողը` նվաճելով 77 կգ քաշային կարգում ծանրամարտի Եվրոպայի չեմպիոնի կոչումը: Առաջնությունն անցկացվում է Բելառուսի Մինսկ քաղաքում: Պոկում վարժությունում հայազգի ծանրորդը բարձրացրեց 165 կգ և երկամարտի 360 կգ արդյունքով այս քաշային կարգում չեմպիոն հռչակվեց:

Արծաթե մեդալը նվաճեց լեհ ծանրորդ Քրիստոֆ Շրամյակը (351 կգ), իսկ բրոնզը` բելառուսցի Նիկոլայ Չեռնյակը (346 կգ):

Գյումրեցի ծանրորդը, որն արդեն անհասանելի էր մրցակիցների համար, երրորդ մոտեցմամբ փորձեց ռեկորդ սահմանել` հրում վարժությունում պատվիրելով 205 կգ: Եվրոպայի կրկնակի չեմպիոնը և 2008 թ. օլիմպիական խաղերի բրոնզե մեդալակիրը, թեև չկարողացավ ավարտին հասցնել վարժությունը, սակայն արժանացավ թիմակիցների և մարզասերների ծափողջույններին:

Բելառուսում անցկացվող նույն առաջնության ընթացքում ավելի վաղ 16-ամյա Սմբատ Մարգարյանը (56 կգ) երկամարտում (109 կգ + 146 կգ) նվաճել էր արծաթե մեդալ: